Десетина будистички калуѓерки изведуваа удари со тупаници и нозе, а некои од нив размавтувајќи со мечеви, додека ги демонстрираа своите боречки вештини пред стотиците расположени добронамерници на долгоочекуваното повторно отворање на нивниот манастир во Непал.
Калуѓерките на манастирот Друк Амитаба на врвот на ридот ја покажаа својата сила да го одбележат повторното отворање на институцијата пет години откако пандемијата на ковид-19 го принуди манастирот да ги затвори вратите за јавноста.
Кунг фу монахињите, на возраст од 17 до 30 години, се припаднички на илјадагодишниот монашки ред Друкпа, кој на калуѓерките им дава еднаков статус со монасите и е единствениот женски ред во патријархалниот будистички монашки систем.
Нормално, од монахињите се очекува да готват и чистат и не им е дозволено да вежбаат боречки вештини. Но, Неговата Светост Ѓалванг Друкпа, монах кој се рангира веднаш под Далај Лама во тибетската будистичка хиерархија, ангажирал тренер за кунг фу да ги научи монахињите од манастирот Друк Амитаб да ја зголемат нивната самодоверба и да развијат вештини за самоодбрана.
Манастирот е отворен во 2009 година и денес згрижува 300 членови на возраст од шест до 54 години.
„Ние се занимаваме со кунг фу за да се задржиме ментално и физички, а нашата цел е да промовираме зајакнување на жените и родова еднаквост“, рече 23-годишната Џигме Јангчуб Чосдон, калуѓерка по потекло од Ладах, во Индија.
Калуѓерките доаѓаат од Бутан, Индија и Непал и сите тренираат кунг фу, кинеска боречка вештина за самоодбрана и сила.
„Со довербата стекната преку кунг футо, навистина сакам да ѝ помогнам на заедницата, на младите девојки да ја изградат сопствената сила“, рече 24-годишната Џигме Јангчен Гамо, монахиња од Рамехап, во Непал.
На веб-страницата на манастирот пишува дека комбинацијата на родова еднаквост, физичка сила и почит кон сите живи суштества претставува враќање на редот кон неговите „вистински духовни корени“.
Во минатото, калуѓерките учествуваа во долги експедиции пеш и со велосипед на Хималаите за да соберат пари за помош при катастрофи, како и да промовираат еколошки начин на живот.
Триесетгодишната Џигме Кончок Ламо од Индија рече дека нејзината главна цел била да постигне просветлување како Буда, кој го основал будизмот пред 2.600 години.
„Но, засега, да се биде обичен човек… Мислам дека повеќе ќе се фокусирам на помагање на другите. Помагањето на другите е наша религија“, вели таа.
