Русија во петокот одговори на забелешките на американскиот претседател Доналд Трамп за војната во Украина, велејќи дека конфликтот е за националната безбедност, а не за цената на нафтата.
Портпаролот на Кремљ, Дмитриј Песков, рече дека прашањата за Русија во Украина се однесуваат на националната безбедност, заканите за Русите кои живеат таму и одбивањето на САД и Европа да ја слушнат загриженоста на Русија. „Овој конфликт не зависи од цените на нафтата“, рече тој, пренесе АФП.
Песков, исто така, рече дека рускиот претседател Владимир Путин е подготвен да разговара со неговиот американски колега Доналд Трамп, но дека чека „сигнали“ од Вашингтон.
Изјавата доаѓа еден ден откако Доналд Трамп, за време на обраќањето на Светскиот економски форум во швајцарскиот Давос, ги повика Саудиска Арабија и другите земји на Организацијата на земјите извознички на нафта (ОПЕК) да ги намалат цените на нафтата.
Во својот говор, Доналд Трамп посочи дека пониските цени ќе помогнат да се стави крај на војната меѓу Русија и Украина.
„Исто така, ќе побарам од Саудиска Арабија и ОПЕК да ја намалат цената на нафтата. Мора да ја намалите, што, искрено, изненаден сум што не го направија тоа пред изборите. Ако цената се намали, руско-украинската војна веднаш ќе заврши“, рече Трамп во своето обраќање.
Доналд Трамп, исто така, тврдеше дека земјите на ОПЕК се, до одреден степен, одговорни за војната меѓу Украина и Русија.
„Во моментов, цената е доволно висока за војната да продолжи. Мора да ја спуштите цената на нафтата, мора да ставите крај на таа војна. Тие требаше да го направат тоа одамна. Тие се многу одговорни, до одреден степен, за тоа што се случува. Јас ќе барам каматите да се намалат веднаш, а исто така тие треба да се намалат низ целиот свет.
Игор Јушков, експерт од Финансискиот универзитет и Фондот за национална енергетска безбедност, за РИА Новости изјави дека со повикувањето на ОПЕК, Трамп во суштина сака да го искористи тоа за да ѝ достави ултиматум на Русија со цел да се стави крај на конфликтот во Украина.
Во исто време, тој истакна дека тоа би било неповолно за организацијата и не е јасно како Трамп ќе ги принуди земјите од ОПЕК да се согласат со неговите услови – освен ако тие исто така не се загрозени со санкции.
Во средата американскиот лидер веќе се закани дека ќе воведе нови санкции и давачки доколку Москва не ја прекине специјалната операција. Шефот на Белата куќа повика на итен прекин на конфликтот во Украина, предупредувајќи на можните негативни последици од продолжувањето на борбите.
Прес секретарот на рускиот претседател Дмитриј Песков рече дека Русија не гледа ништо ново во овие закани. Тој потсети дека на Трамп му се допаднале методите на санкции уште за време на неговиот прв претседателски мандат, но тој сè уште не испратил никакви сигнали за рамноправен дијалог, на кој Москва е подготвена.
