Италијанската премиерка Џорџа Мелони понуди денеска да дејствува како „мост“ со британскиот премиер Кир Стармер на американскиот претседател Доналд Трамп за да се намалат тензиите меѓу САД и Украина.
Пристигнувајќи на Даунинг стрит пред европскиот мировен самит во Лондон, италијанската премиер предупреди дека секоја поделба на Запад ќе доведе до слабеење на сите, објави Телеграф.
„Мислам дека е многу важно да го избегнеме ризикот што го дели Западот. И мислам дека Велика Британија и Италија можат да одиграат важна улога во изградбата на мостот“, рече Мелони, која има пријателски односи со Доналд Трамп, пренесе британскиот весник.
Таа му се заблагодари на Стармер што собра низа европски лидери на кризните разговори за Украина, велејќи дека ОК и Италија се многу координирани за целта што сакаат да ја постигнат, а тоа е праведен и траен мир во Украина.
Стармер денеска во Лондон е домаќин на украинскиот претседател Володимир Зеленски и голем број европски лидери, кои ќе разговараат за безбедносните гаранции што европскиот континент може да ги понуди на Киев во случај на прекин на огнот со Русија.
Фото: Facebook / Keir Starmer
