Цените на акциите пораснаа на Волстрит во средата, по два дена остар пад, бидејќи инвеститорите беа охрабрени од пораките од Белата куќа кои укажуваат на олеснување на царините од Вашингтон.
Индексот Dow Jones порасна за 1,14 отсто, на 43.006 поени, додека S&P 500 порасна за 1,12 отсто, на 5.842 поени, а индексот Nasdaq за 1,46 отсто, на 18.552 поени.
На самиот почеток на вчерашната трговска сесија се чинеше дека индексите ќе паднат трет ден по ред бидејќи новите знаци за забавување на американската економија ги обесхрабрија инвеститорите.
Но, тогаш Белата куќа објави дека ќе ги ослободи автомобилите увезени од Канада и Мексико од царини на еден месец, што ги охрабри инвеститорите.
Потегот на Белата куќа ги зајакна надежите за намалување на тензиите во трговската војна, која започна претходно оваа седмица кога Вашингтон воведе царини од 25 отсто на увозот од Канада и Мексико, а Канада возврати со царини за увоз на американски производи.
Со оглед на тарифните ослободувања, акциите на производителите на автомобили вчера беа меѓу најголемите добитници. Цената на „General Motors“ скокна повеќе од 7 отсто, „Ford“ речиси 6 отсто, а „Tesla“ околу 2,5 отсто.
„Во моментов сме на царински ‘тобоган’. Економските показатели, Fed, новости од компаниите… сето тоа сега е во втор план. Последниот развој на настаните е само потсетник за тоа колку политиката може да влијае на пазарот и како тој реагира на тоа“, вели Васиф Латиф, директор во компанијата „Sarmaya Partners“.
Цените на акциите вчера пораснаа и на европските берзи. Иако лондонскиот FTSE индекс се лизна за 0,04 отсто, на 8.755 поени, франкфуртски DAX скокна за 3,38 отсто, на 23.081 поен, а париски CAC скокна за 1,56 отсто, на 8.173 поени.
