Соединетите држави ја прекинуваат сета федерална финансиска поддршка за Јужноафриканската Република, изјави во петокот американскиот претседател Доналд Трамп.
„За да направиме чекор понатаму, секој земјоделец (со семејство!) од Јужна Африка што сака да ја напушти земјата поради безбедносни причини, ќе биде поканет во Соединетите држави со забрзан пат до државјанство“, напиша Трамп на својата социјална мрежа Truth Social додавајќи дека тој процес ќе започне веднаш.
Американската странска помош за ЈАР изнесуваше 323,4 милиони долари во 2024 година, според податоците на американската влада.
Трамп во февруари потпиша извршна наредба за намалување на американската финансиска помош за ЈАР, наведувајќи го неодобрувањето на нејзината политика за земјиштето и тужбата за геноцид пред Меѓународниот суд на правдата против сојузникот на Вашингтон, Израел.
Јужноафриканското Министерство за надворешни работи тогаш рече дека извршната наредба „нема фактичка точност и не ја препознава длабоката и болна историја на јужноафриканскиот колонијализам и апартхејдот“.
Трамп, без да наведува докази, рече дека „Јужна Африка конфискува земја“ и дека „одредени класи луѓе“ се третираат „многу лошо“.
Илон Маск, милијардер роден во Јужна Африка, кој е близок со Трамп, рече дека белите Јужноафриканци се жртви на „расистички закони за сопственост“.
Јужноафриканскиот претседател Сирил Рамафоса, кој минатиот месец потпиша закон за да и се олесни на државата да експроприра земјиште во јавен интерес, ја брани политиката. Тој рече дека владата не конфискувала ниту едно земјиште и дека политиката е насочена кон изедначување на расните нееднаквости во сопственоста на земјиштето во нацијата со мнозинство црнци.
Јужноариканската Република има историја на колонијално освојување и обеспособување што го турна црното мнозинство во пренаселени урбани населби и рурални резервати. Британските империјални господари на земјата им го дадоа најголемиот дел од земјоделското земјиште на белците. Во 1950 година, пробританската Национална партија на Африканците усвои закон со кој зазеде 85 отсто од територијата и протера 3,5 милиони црнци од нивните предци.
Белите земјопоседници сè уште поседуваат три четвртини од празното земјоделско земјиште во Јужна Африка. Ова е во спротивност со четирите проценти во сопственост на црнците, кои сочинуваат 80 проценти од населението во споредба со околу осум проценти за белците, според најновата ревизија на земјиштето во 2017 година.