Српскиот парламент соопшти дека од безбедносни причини зградите на Народното собрание ќе бидат затворени од денеска до понеделник со цел да направат се што е во нивна моќ најавениот митинг на 15 март во Белград, пред Народното собрание, да се одвива без никакви инциденти.
„Почитувани пратеници и вработени во Народното собрание, ве известуваме дека врз основа на безбедносната оценка на Министерството за внатрешни работи, а со цел да се избегне каков било, макар и минимален простор за предизвикување потенцијални провокации и конфликти, генералниот секретар на Народното собрание одлучи зградите на Народното собрание, имено Домот на Народното собрание, Трг Никола Пашиќ да бидат затворени Петок, 14 март до 16 март 2025 година на полноќ“, се вели во одлуката.
Во меѓувреме студентите во блокада објавија план за дочекот на пешаците, маратонците и велосипедистите кои пеш тргнаа кон главниот град во пресрет на утрешниот собир во Белград. Локација за дочекот ќе биде – Теразије, од 19 часот. Од 19:30 часот е планиран првиот дочек на велосипедисти, а дочекот на последната група пешаци, според планот, ќе се случи помеѓу 21:45 и 22:45ч.
Се очекува дека во Белград до сабота да пристигнат илјадници луѓе од цела Србија, а на улиците ќе бидат и граѓаните на Белград, веројатно во голем број, бидејќи поддршката за протестите продолжува и покрај кампањата на Вучиќ против нив.
Протестите започнаа како спорадични демонстрации чиишто учесници бараат одговорност за смртта на 15 лица при падот на настрешницата во Нови Сад, но брзо прераснаа во национално движење насочено кон прашања како што се барањата за големи демократски реформи.
