Компанијата „Адора инженеринг“ е добитник на светската награда The Bizz 2016. за иновативен стил во домувањето во Монте Карло од страна на Светската бизнис конфедерација.
Ова е една од најзначајните награди која им се доделува на водечките компании во развојот на бизнисот на национално и светско ниво.
Генералниот директор на компанијата, професор д-р Ванчо Чифлиганец истакна дека наградата претставува дополнителен мотив за компанијата, а воедно претставува и признание како за компанијата, така и за целата држава.
-Чест ни е што го добивме ова светско признание од страна на Светската бизнис конфедерација, каде што членуваат 3.000 членки и над 100 држави. За нас мотив плус претставува тоа што ја препознаа „Адора инженеринг“ во унапредувањето на квалитетното домување. Чест е што иновативниот приод кога се работи за квалитетното домување е се повеќе присутен во Македонија преку компанијата „Адора инженеринг“, вели Чифлиганец, кој додава дека наградата за нив претставува голема чест и мотивација.
Тој додаде дека оваа награда освен што е признание за „Адора инженеринг“, воедно е признание и за Република Македонија.
Заменик генералниот директор на компанијата, Душко Чифлиганец вели дека оваа награда се должи на иновативниот пристап на целиот тим на „Адора инженеринг“, а потенцира и дека стандардите кои ги нуди компанијата во областа на квалитетното домување кај станарите ќе влеат чувство на удобност и топлина.
-Оваа награда се должи на иновативниот пристап на целиот тим на „Адора инженеринг“, во соработка со познати европски архитекти и дизајнери. Иновативноста пред се се однесува на стилот на домувањето, особено на атриумите на објектите, кои се оплеменети со материјали на дрво, природен камен, зеленило и амбиентално осветлување, кои пред се се извор на природна светлина и свеж воздух во внатрешноста на објектите, а на станарите ќе им овозможат чувство на удобност и топлина, вели Душко Чифлиганец.
Тој додава дека оваа награда исто така се должи и на тоа што посебно внимание е посветено и на звучната излоација до 63 децибели, што е 80 отсто над македонските стандарди.
Компанијата „Адора инженеринг“ во своето четиринаесетгодишно постоење во високата градба има добиено 4 интернационални и 20 национални признанија, за кои од компанијата велат дека се мотив плус да продолжат и натаму со пионерските иновативни проекти да ги доближуваат придобивките од светските трендови и стандарди во домувањето на македонските граѓани, а со тоа да ја движат напред целата индустрија на високата градба во Република Македонија.
