Американската влада ги засилува заканите со санкции во обид да го запре контроверзниот гасовод „Северен тек 2“, кој ќе ја поврзе Русија со Германија, изјави американски официјален претставник за „ДПА“.
Сакајќи да остане анонимен, официјалното лице изјавило дека американската влада веќе издвоила неколку компании и поединци кои би можеле да ги санкционираат доколку не запрат со активности поврзани со гасоводот, кој вклучува и транспорт, пренесува Хина.
„Ние сме во процес на комуникација со голем број од овие компании за да им дадеме до знаење дека се вклучени во активности подложени на санкции“, рече официјалниот претставник, одбивајќи да каже за кои компании станува збор.
„Многу од овие компании не се свесни за ова и овие повици ќе им овозможат да се повлечат од овие активности“, рече тој.
Владата на САД ќе извести пред Конгресот за неколку дена или недели за компаниите што би биле предмет на санкции.
Соединетите држави го усвоија законот ПЕЕСА во декември 2019 година, кој предвидува 30-дневен период на повлекување за повеќето компании за кои е утврдено дека вршат активности предмет на санкции на гасоводот.
Изградбата на гасоводот „Северен поток 2“ ќе заврши наскоро. Гасоводот ќе го удвои снабдувањето со природен гас на Русија преку Балтичко Море до Германија, најголемата европска економија.
Противниците на гасоводот, вклучувајќи ги Соединетите Држави, Полска и Украина, велат дека гасоводот ќе и овозможи на Русија економски да ја задуши Германија, додека германската влада вели дека ќе создаде директно и безбедно снабдување со енергија.
Во соопштението на „Северен тек 2“ се вели дека сите кои се занимаваат со финансирање и снабдување, вклучително и рускиот „Гаспром“, се „целосно финансиски посветени на проектот“.
