Американската војска се подготвува да испрати околу 1.500 дополнителни војници на границата со Мексико, изјави во средата официјален претставник на САД, само два дена откако претседателот Доналд Трамп потпиша извршна наредба за имиграцијата.
Службеникот, кој сакале да остане анонимен, не кажал за Reuters точно кога ќе бидат распоредени војниците.
Тие ќе им се придружат на приближно 2.200 активни војници и илјадници припадници на Националната гарда кои се веќе распоредени на таа граница.
Подоцна во средата, Белата куќа објави дека Трамп потпишал извршна уредба за суспендирање на влезот на мигрантите во САД на јужната граница со Мексико.
За време на неговиот прв мандат, републиканецот Трамп нареди 5.200 војници да помогнат во обезбедувањето на границата со Мексико. Поранешниот демократски претседател Џо Бајден, исто така, распореди војници на границата.
На неговиот прв ден на функцијата, Трамп ја прогласи илегалната имиграција за национална вонредна состојба, ја задолжи војската на САД да помогне во обезбедувањето на границата, издаде широка забрана за азил и презеде чекори за ограничување на државјанството за децата родени на американска почва.
Неговата извршна наредба од 20 јануари му наложува на Пентагон да испрати онолку војници колку што е потребно за да се добие „целосна оперативна контрола на јужната граница на САД“. „Во рок од 90 дена, од шефовите на Министерството за одбрана и Министерството за домашна безбедност ќе се бара да препорачаат дали можеби се потребни дополнителни активности, вклучително и повикување на Законот за бунт од 1807 година“, се наведува во објавата.
Законот за бунт од 1807 година му дозволува на американскиот претседател да распореди војска за да ги потисне бунтовите во земјата, а исто така се користи и како инструмент за задушување на граѓанските немири.
Трамп повторно влезе во Белата куќа, ветувајќи дека ќе ја зајакне безбедноста на границите и ќе депортира рекорден број мигранти.
Крајбрежната стража, која е одговорна за поморската безбедност и спроведувањето на законот, во вторникот соопшти дека „веднаш ќе распореди“ војници и бродови во голем број области, вклучително и југоисточната граница во близина на Флорида, за да „одврати и спречи масовна поморска миграција од Хаити и/ или Куба“.
Гардата вели дека друга клучна област е поморската граница меѓу Тексас и Мексико во „Американскиот залив“. Имено, Трамп изјави дека сака да го смени името на Мексиканскиот залив во Американскиот залив.
