Контраофанзивата на Украина против Русија ќе биде исклучително скапа за нејзините војници и ќе продолжи неколку месеци, изјави во петокот претседателот на Здружениот генералштаб на САД, Марк Мили.
Говорејќи во Националниот прес-клуб во Вашингтон, највисокиот воен командант на САД го понуди својот став за конфликтот во Украина, велејќи дека „воопшто не ме изненадува“ што многу нагласената контраофанзива на Киев оди побавно од очекуваното.
„Она што го кажав е дека ова ќе трае шест, осум, десет недели. Ќе биде многу тешко. Ќе биде многу долго и ќе биде многу, многу крваво“, рече тој, истакнувајќи дека напредувањето на Киев е попречено од руските мински полиња.
„Никој не треба да има илузии за ништо од тоа“, нагласи тој, додавајќи дека Украина се бори за опстанок против силен противник.
На прашањето дали САД ќе ѝ достават на Украина касетна муниција, која е забранета во повеќе од 100 земји поради значителниот ризик што тие го претставуваат за цивилното население, Мили истакна дека Вашингтон „има секакви опции“, додавајќи дека конечната одлука за работата е на американскиот претседател Џо Бајден.
Украинските сили започнаа голема офанзива долж неколку делови од фронтот на почетокот на јуни, но сите нивни напади беа одбиени со големи загуби, соопшти руското Министерство за одбрана.
Украинските власти признаа дека контраофанзивата се соочила со тешкотии. Претседателот Володимир Зеленски рече дека се развива „побавно од посакуваното“ соочени со „силниот отпор“ од руските трупи. Валери Залужни, највисокиот украински генерал, рече дека „се лути“ кога луѓето велат дека офанзивата се одвива премногу бавно, објаснувајќи дека тоа „не е шоу“ и дека „секој метар е даден со крв“.
