Според мајското истражување на опозициската Партија за слобода и правда (ССП), доколку изборите во Србија се одржат денеска, одзивот би изнесувал 69,1 отсто, а 41,1 отсто од граѓаните би гласале за новата обединета партија СНС-СПАС, иако според други мерења на јавното мнение покажуваат далеку поголема разлика во полза на партијата на српскиот претседател Александар Вучиќ.
За Српската социјалистичка партија (СПС) на актуелниот претседател на парламентот, Ивица Дачиќ, би гласале 6,5 отсто граѓани, за опозицијата која ја вклучува и ССП би гласале 32,9 отсто, сѐ уште не се одлучиле за кого би гласале 9,8 проценти, а за опозицијата која би коалицирала со владејачката СНС, доколку оваа партија ги покани – ДСС, ПОКС, СРС и Заветници, би гласале 5,8 отсто. Партиите на националните малцинства имаат 3,7 отсто поддршка.
Мариника Тепиќ од опозициската ССП, според ова истражување, е најпопуларниот политичар во Србија и повеќе од милион луѓе имаат одлично мислење за неа и за она што таа го прави.
ССП соопшти дека на прашањето за односот кон Русија, Кина и Европската унија, граѓаните сметаа дека Русија има најдобар статус, речиси 70 отсто се изјасниле позитивно и само 5,4 негативно.
„ЕУ има 33,3 отсто поддршка, 35,7 проценти се против, а Кина полека се приближува кон Русија. Дури 64,6 отсто од српските граѓани имаат позитивен став кон Кина, 10,2 проценти негативен и 25,2 отсто се неутрални“, се наведува во истражувањето.
На почетокот на презентацијата на резултатите, претседателот на Партијата за слобода и правда, Драган Ѓилас, праша „кои се сличностите меѓу Белорусија и Србија?“
„Прво, и двете земји имаат парламент без опозиција и второ, во Белорусија, претседателот на таа земја, Александар Лукашенко, донесе закон во кој се кажува дека истражувањата можат да се објават само доколку ги одобри владата. Со оглед на тоа што Лукашенко е модел за овој Александар (Вучиќ, претседател на Србија) можно е наскоро и ние да добиеме таков закон. Па сè додека тоа не се случи, ќе ја користиме можноста да ви кажеме што мислат граѓаните на Србија според истражувањето направено во мај“, изјави Ѓилас.