Данела Арсовска, кандидат за градоначалник на Град Скопје на стартот на изборната кампањата за претстојните локални избори вели дека има визија и е подготвена од Скопје да направи достоен град за сите скопјани.
-Да изградиме многу нови паркови, да насадиме нови дрвја, да воведеме ред и да обезбедиме чист воздух за нашите деца, да ја разиграме нашата живописна култура, да создадеме модерна инфраструктура. Скопје ќе биде европска метропола со сообраќаен ред, брз и ефикасен јавен превоз, со паркови и културен живот кој пулсира од сите страни на нашиот град. Ова е Скопје што јас го сакам, за кое што имам визија, и тоа е Скопје кое што ние сите го заслужуваме, вели Арсовска.
-Јас сум подготвена, со тим, со план, со визија, без празни ветувања и утописки проекти кои никогаш нема да станат реални, Скопје да го претворам во достоен град, град на кои ќе бидеме горди и кој го заслужуваме. Јас сум жена која верува на фактите, на бројките и верува во вистински решенија. Верувам во брзи и сигурни решенија кои ќе го променат нашиот град на подобро, кои ќе го подобрат животот на сите граѓани, рече Арсовска.
Арсовска вети брза реализација на проектите, а планот содржи 15 +1 главен проект кои како што рече таа ќе го подобрат нашето секојдневие.
-Оваа визија е содржана во јасен план, креиран од мене заедно со врвни експерти. Во неа има реални, брзи и сигурни решенија за подобрување на квалитетот на животот во нашиот град. Не ветувам утописки проекти, туку реални проекти што можат да се реализираат брзо, повеќето од нив во рок и од 2 години. Мојот план содржи 15+1 главни проекти за Скопје да биде модерен град, достоен за живот. 15+1 главни проекти кои ќе го подобрат нашето секојдневие, изјави Арсовска.
-Од заживување на Скопје како културно жариште, до одржливо решение за сообраќај и паркирање. Од нов урбанистички план со кој ќе се запре неконтролираната градба, ќе се зачува зеленилото и ќе се создадат нови паркови, до градска администрација која ќе биде врвно мотивирана и во функција исклучиво на граѓаните, кажа Арсовска. Од заживување на Скопје како културно жариште, до одржливо решение за сообраќај и паркирање. Од нов урбанистички план со кој ќе се запре неконтролираната градба, ќе се зачува зеленилото и ќе се создадат нови паркови, до градска администрација која ќе биде целосно во функција за граѓаните. Ќе имплементирам реални проекти кои ќе имаат вистински придобивки за граѓаните. Ќе воведеме бесплатен јавен превоз. Ќе го оживееме културниот живот. Ќе го направиме Скопје град на фестивали – со по еден голем фестивал секој месец. Ќе го заштитаме нашето зеленило и нашата природа, но ќе градиме и нови големи паркови и рекреативни области во секоја скопска општина, онаму каде што и никој до сега не помислил. И ќе го вратиме сјајот на сите заборавени места низ нашиот град. За сите наши села што го опкружуваат градот, ќе ја доведеме инфраструктурата по модел на модерни и функционални патишта, ќе овозможам подобар јавен превоз и иницијатива за заживување на селските центри, децидна е Арсовска.
