Австралиецот Џулијан Асанж, основачот на разобличувачката медиумска група WikiLeaks, во вторникот им порача на европските пратеници дека неговото признание за виновен по обвиненијата за шпионажа што ги покренаа САД против него било неопходно, бидејќи правните и политичките напори за заштита на неговата слобода се покажале како недоволни.
Асанж во вторникот се обрати пред Комитетот за правни прашања и човекови права на Парламентарното собрание на Советот на Европа (PSSE) во Стразбур.
„Се изјаснив за виновен што се занимавам со новинарство. На крајот ја избрав слободата наместо недостижна правда“, рече 53-годишниот Асанж во своето прво јавно обраќање откако беше ослободен од затвор.
Тој беше обвинет дека примил и објавил стотици илјади документи со детали за воените злосторства на САД во Ирак и Авганистан, како и непријатни депеши на американската дипломатија со невкусни забелешки за светските челници, дури и за најголемите сојузници на Вашингтон што предизвика големи непријатности. Обвиненијата произлегуваат од 2010 година, кога WikiLeaks објави стотици илјади доверливи американски воени документи за војните на Вашингтон во Авганистан и Ирак, едно од најголемите протекувања на доверливи информации во историјата на САД.
Асанж се врати во Австралија во јуни, откако постигна договор што му ја обезбеди слободата, но го принуди да се изјасни за виновен за кршење на законите за шпионажа на Соединетите држави, ставајќи крај на 14-годишната правна сага, започната со обвинувања за наводно силување и сексуално злоставување во Шведска, коишто подоцна беа отфрлени.
PSSE објави извештај за неговиот случај во кој се заклучува дека Асанж е политички затвореник и ја повика Велика Бротанија да истражи дали бил подложен на нехуман третман.
„Сакам да бидам јасен: денес не сум слободен затоа што системот функционираше, туку затоа што по многу години се изјаснив за виновен за новинарството, затоа што барав информации и затоа што ја информирав јавноста за овие информации“, рече Асанж.
Австралиецот, исто така, додаде дека за него правдата е засекогаш заклучена, бидејќи американската влада инсистирала дека тој не може да поднесе тужба до Европскиот суд за човекови права.
„Затоа е толку важно што (…) институциите за поставување норми како PSSE да дејствуваат за да појаснат дека она што ми се случи мене не треба да им се случува на другите“, рече Асанж.
„Да се обврземе сите да го направиме нашиот дел за да се осигураме дека светлината на слободата никогаш не згаснува, дека потрагата по вистината продолжува и дека интересите на малкумина не ги замолчуваат гласовите на мнозинството“, додаде.
Асанж, исто така, рече дека преминот од држење во затвор со максимално обезбедување до обраќање пред комисија е голем и длабок, но дека искуството да се биде изолиран во мала ќелија е тешко да се пренесе.
„Тоа ви го одзема чувството за себеси. Сè уште не сум целосно способен да зборувам за она што го доживеав. Тоа што ми се случи не смее да му се случи на никој друг“, рече Асанж и им се заблагодари на сите што се залагаа за негово ослободување.
„Слободата на говорот и сѐ што произлегува од неа е на темна раскрсница“, предупреди тој.
Асанж изминатите 14 години ги помина криејќи се во амбасадата на Еквадор во Лондон, а потоа по смената на власта во оваа јужноамериканска земја по барање на САД му беше ускратен престојот во дипломатското претставништво и британската полиција го приведе во затворот со максимална безбедност во Белмарск, недалеку од Лондон.
Додека американските власти го сметаат Асанж за непромислен затоа што им се заканувал на нејзините агенти со објавување на нивните имиња, неговите поддржувачи го поздравуваат како херој за промовирање на слободата на говорот и разоткривање на воените злосторства.
