-Агенцијата за аудио и аудиовизуелни медиумски услуги (АВМУ) го осудува повторното етикетирање и дискредитирање на ТВ Канал 5 во денешната објава на претседателот на политичката партија Левица Димитар Апасиев на социјалната мрежа Фејсбук.
Со објавата, лидерот на Левица покажува крајно недоличен однос, ја загрозува слободата на информирање и го нарушува достоинството на медиумските работници. Користењето на вулгарни фрази, како и изрази со кои може да поттикне говор на омраза од страна на неговите следбеници на социјалните мрежи е крајно неприфатливо и може да ја загрози сигурноста на медиумските работници, соопштија од АВМУ.
Политичарите и носителите на јавни функции мора да свесни за тежината на искажаните зборови и одговорноста што ја имаат пред граѓаните и да покажат највисоко ниво на почитување на новинарската професија и на медиумите.
Ова е дел од стандардите утврдени во Кодексот на однесување во онлајн сферата за време на изборни процеси и референдуми, на чие почитување политичката партија Левица доброволно се обврза, се додава во соопштението.
