Австралиската држава Нов Јужен Велс ја помилуваше во понеделникот жената која мина две децении во затвор поради смртта на нејзините четири деца, откако судската ревизија утврдила дека постои разумен сомнеж во првата пресуда.
Кетлин Меган Фолбиг во 2003 година беше осудена за убиството на своите три деца и за убиството на четвртото од небрежност. Таа тврдеше дека е невина и дека децата починале од природна смрт.
Првата истрага во 2019 година покажа дека доказите ја поткрепуваат нејзината вина. Но втората истрага која ја водел главниот судија Томас Батхарст во 2022 ја преиспитувала осудителната пресуда, бидејќи новите докази сугерирале дека две од децата имале генетска мутација која можела да ја предизвика нивната смрт.
Главниот обвинител на Нов Јужен Велс, Мајкл Дејли, ја помилуваше Фолбиг во понеделникот откако систематизираните наоди на истрагата на Батхарст утврдиле разумно сомневање во пресудата.
„Денешниот исход претставува потврда дека нашиот правосуден систем е способен да ја испорача правдата и покажува дека владеењето на правото е важна поткрепа за нашиот демократски систем. Имајќи предвид што сѐ се случи во последните 20 години, невозможно е да не се сочувствува со Кетлин и Крег Фолбиг“, изјави Дејли.
Во меморандумот до главниот државен обвинител, Батхарст навел дека постои разумна можност дека три од децата починале со природна смрт, две поради генетска мутација позната како CALM2-G114R, а едно поради неврогено нарушување.
Таквите сомнежи го поткопале крунскиот случај на убиство на нејзиното четврто дете од небрежност, додал Батхарст.
„Натаму, не можам да го прифатам тврдењето дека доказите потврдуваат дека г-ѓа Фолбиг била нешто друго освен грижлива мајка на своите деца“, навел судијата Батхарст.
