Американскиот претседател Џо Бајден во четвртокот рече дека воениот одговор на Израел на нападот на Хамас во Газа на 7 октомври е „претеран“.
„Јас сум на гледиште, како што знаете, дека одговорот во Газа, беше претеран“, им рече тој на новинарите во Белата куќа.
Бајден ги истакна своите напори за постигнување на долгоочекуваниот договор за заложниците и одржливата пауза во борбите: „Има многу невини луѓе кои гладуваат, многу невини луѓе кои се во неволја и умираат, и тоа мора да престане“.
Во меѓувреме, неговата администрација ги истакна условите за примателите на американската воена помош во нов меморандум. Имено, Вашингтон бара „веродостојни и сигурни писмени гаранции“ за придржување кон меѓународното право, вклучително и меѓународното право за човекови права.
Документот не споменува ниту една земја, но доаѓа во време на зголемени повици во САД да условат помош за Израел поради загриженоста во врска со операцијата на израелските одбранбени сили (ИДФ) во Газа.
Зборувајќи за процесот на преговори, Бајден рече дека разговарал со „претседателот на Мексико“, мислејќи на лидерот на Египет Абдел Фатах Ел-Сиси. (Ова не е првпат тој да ги меша имињата неодамна. Претходно оваа недела тој, наводно, се осврнал на разговорот што го имал со Ангела Меркел во 2021 година дека се одржал со покојниот германски канцелар Хелмут Кол).
