Верниот сојузник на Израел, САД и Саудиска Арабија во понеделникот апелираа до Израел да го ублажи нападот врз Газа, откако најголем број Палестинци беа убиени во еден ден од почетокот на војната.
Американскиот претседател Џо Бајден, соочен со демонстрантите кои извикуваа „Прекин на огнот“, додека беше во посета на црквата во Чарлстон, во сојузната држава Јужна Каролина, рече дека „тивко“ работи со израелската влада за да ја натера израелската војска да ги намали своите напади и „значително да излезе од Газа“.
Израелските сили во понеделникот го бомбардираа источниот дел на јужниот град Кан Јунис и централниот дел на Појасот Газа, соопштија тамошните жители. Здравствените власти во Газа, управувана од Хамас, соопштија дека во текот на ноќта загинале 247 лица. Военото крило на Хамас соопшти дека неговите борци истрелале ракети врз израелскиот град Тел Авив како одговор на, како што рече, „ционистичките масакри врз цивилите“.
Американскиот државен секретар Ентони Блинкен го посети регионот во обид да спречи војната меѓу Израел и Хамас да се претвори во регионален конфликт. Блинкен треба да пристигне во Израел по еднодневната средба со лидерите на земјите од Персискиот залив.
Блинкен во понеделникот разговараше со функционерите од Обединетите Арапски Емирати и Саудиска Арабија за да се обиде да најде излез од најкрвавото поглавје досега во повеќедеценискиот израелско-палестински конфликт. Тоа е негова четврта мисија во регионот по смртоносните напади на 7 октомври врз Израел од страна на милитантите на Хамас, на кои Израел одговори со започнување копнена офанзива во Газа.
Престолонаследникот на Саудиска Арабија, Мохамед бин Салман ја истакна важноста од ставање крај на непријателствата во Газа и изнаоѓање пат кон мир, објави саудиската државна новинска агенција SPA. Агенцијата наведува дека престолонаследникот, кој го предводеше зближувањето меѓу неговата земја и Израел пред избувнувањето на војната, ја истакнал потребата од враќање на стабилноста и обезбедување на легитимните права на палестинскиот народ.
Високиот претставник на Европската унија за надворешна политика, Жозеп Борел, му се придружи на Блинкен во Саудиска Арабија, што е знак на меѓународна загриженост, наведува Reuters.
