Администрацијата на американскиот претседател Џо Бајден има намера да го заостри пристапот до азил на границата меѓу САД и Мексико со нова регулатива што би можела да биде издадена веќе во четврток, со цел да се намалат илегалните преминувања, изјавија за Reuters три извора запознаени со ова прашање.
Регулативата ќе бара мигрантите да бидат проценети во почетната фаза од проверката за азил за да се види дали треба да им биде одбиен азил и брзо да бидат депортирани, велат анонимните извори. Мерката се чини дека е ограничена по обем, додаваат тие.
Мигрантите ќе бидат проценети за забрана за барање азил врз основа на криминал и безбедносни закани, изјавиле два извора.
Белата куќа не одговорила веднаш на барањето на Reuters за коментар.
Американскиот претседател Бајден, демократ кој бара нов мандат, се соочи со рекорден број мигранти приведувани додека ја минуваат границата меѓу САД и Мексико откако ја презеде функцијата во 2021 година.
Поранешниот претседател Доналд Трамп, републиканскиот противник на Бајден, го критикуваше актуелниот претседател за повлекување на порестриктивните политики што ги воведе за време на неговиот мандат.
