Американскиот претседател Џо Бајден во понеделникот најави дополнителна воена помош за Украина од 2,5 милијарди долари, додека ги користи последните седмиици на функцијата за да ја зголеми воената помош за Киев пред новоизбраниот претседател Доналд Трамп да ја преземе функцијата.
„Според моите упатства, Соединетите држави ќе продолжат да работат неуморно на зајакнување на позицијата на Украина во оваа војна до крајот на мојот мандат“, рече Бајден во псимената изјава.
Најавата на Бајден вклучува воена помош од 1,25 милијарди долари повлечена од американските воени залихи и пакет од 1,22 милијарди долари на Иницијативата за безбедносна помош за Украина (USAI), последниот пакет на USAI во мандатот на Бајден за кој тој имаше дискреционо право.
Според USAI, воената опрема се набавува директно од одбранбената индустрија или партнерите, наместо од американските залихи, што значи дека може да бидат потребни месеци или години за да стаса до бојното поле.
Во изјавата, Бајден рече дека новата помош ќе ѝ обезбеди на Украина „непосреден прилив на способности кои ќе продолжат да се користат со голем ефект на бојното поле и долгорочни резерви на воздушна одбрана, артилерија и други системи за критични оружја“.
Во речиси тригодишната војна, Вашингтон одвои 175 милијарди долари вкупна помош за Украина, но неизвесно е дали помошта ќе продолжи со тоа темпо во времето на Трамп, кој ќе го замени Бајден на 20 јануари.
Трамп рече дека сака да стави крај на војната во Украина. За време на претседателската кампања, Трамп го доведе во прашање нивото на американска вклученост во конфликтот, сугерирајќи дека европските сојузници треба да сносат поголем финансиски товар за војната која се води во нивното непосредно соседство.
Некои од неговите сопартијци републиканци кои ќе ги контролираат и Претставничкиот дом и Сенатот почнувајќи од следниот месец, исто така се оладија во настојувањата за испраќање поголема воена помош за Киев.
Бајден рече дека Министерството за одбрана е во процес на испорака на стотици илјади артилериски гранати, илјадници ракети и стотици оклопни возила „што ќе ја зајакне Украина додека влегува во зимата“.
