Американскиот претседател Џо Бајден во интервју за телевизиската мрежа MSNBC News во неделата рече дека прекинот на огнот во Газа е „секогаш можен“ пред почетокот на светиот муслимански месец на постот Рамазан и дека тој не се откажува од примирјето.
Во изјава за MSNBC, Бајден рече дека заканата на Израел за инвазија врз градот Рафах на самиот југ од Појасот Газа ќе биде негова „црвена линија“ за премиерот Бенјамин Нетанјаху, но потоа рече дека нема црвена линија и дека „никогаш нема да го напушти Израел“.
Во доста контрадикторниот разговор, Бајден рече дека „не може да има уште 30.000 мртви Палестинци како резултат на нападите врз милитантите на Хамас“.
Бајден и неговите помошници силно го повикаа Нетанјаху да не започнува голема офанзива на Рафах додека Израел не развие план за масовна евакуација на цивили од последниот појас на Газа, додека градот е континуирано изложен на артилериски и воздушни удари а сè уште не го нападнале копнените сили. Повеќе од половина од 2,4 милиони жители на Појасот Газа под нападите на израелската војска беа принудени да ги напуштат своите домови во северните и централните области на тесната крајбрежна енклава да се евакуираат во Рафах, градот на самата граница со Египет кој пред војната имаше околу 300.000 жители.
„Постојат и други начини за справување со траумата предизвикана од Хамас“, рече Бајден, мислејќи на дивеењето на исламистичката група на 7 октомври 2023 година во јужен Израел во кое загинаа 1.200 луѓе.
Рамазан годинава започнува на 10. и 11. март, во зависност од географската местоположба.
