Извршителите запленија замрзнувач и машина за кафе од канцеларијата на белгиската државена секретарка за миграција во четвртокот за да спроведат судска одлука во случајот што го поднесоа баратели на азил откако поминаа неколку месеци на улица, соопшти нивниот адвокат.
Замрзнувачот и кафематот ќе бидат понудени на аукција, а приходите ќе бидат наменети за тужителите, група од околу 20 баратели на азил кои го загубија својот азил откако властите минатата година евакуираа сквотот во центарот на Брисел и ги принудија три месеца да живеат на улица.
Потоа барателите на азил побарале засолниште, а судот ѝ наложил на државата да им ги обезбеди. Бидејќи тоа не било сторено, канцеларијата на државната секретарка сега е казнета за секој ден што барателите на азил го минале на улица.
„Целта беше да се покаже дека владеењето на правото сѐ уште постои овде“, рече адвокатката Мари Дутрепон, која ја побара мерката во име на своите клиенти.
Весникот De Tijd претходно објави дека извршители дошле во канцеларијата на државната секретарка Никол де Моор во четвртокот наутро и ги натовариле работите во камион.
Дутрепон рече дека нејзините клиенти се само некои од околу 2.700 бездомници кои бараат азил во Белгија, од кои повеќето се во регионот на Брисел. И покрај нивните барања за азил кои се во тек, недостигот од јавни објекти ги остави без сместување, што е кршење на европското право за бегалци.
Иако запленетата стока е недоволна за покривање на вкупните побарувања на нејзините клиенти, кои изнесуват околу 3.000 евра по лице, овој потег имал за цел да испрати порака до владата да се справи со она што Дутрепон го нарече „неодржлива станбена криза“.
Државната секретарка, којашто претходно изјави дека плаќањето на казната нема да ја реши кризата, на платформата Х објави дека правните дејствија или заплените „не нè доближуваат ниту еден сантиметар до тоа да имаме доволно засолништа“.
