Регулаторната комисија за енергетика и водни услуги (РКЕ) денеска донесе Одлука со која се врши зголемување на малопродажните цени на нафтените деривати во просек за 0,09 % во однос на 18 мај. Според Одлуката, малопродажната цена на ЕУРОДИЗЕЛ (Д-Е V) се намалува за 1,00 ден/лит, додека на бензините ЕУРОСУПЕР БС-95 и ЕУРОСУПЕР БС-98 се зголемуваат за 0,50 ден/лит.
Малопродажната цена на Екстра лесното масло за домаќинство (ЕЛ-1) се намалува за 0,50 ден/лит. Цената на Мазутот М-1 НС се зголемува за 0,624 ден/кг и сега ќе изнесува 54,963 ден/кг.
Така, од утре, максималните цени на нафтените деривати ќе изнесуваат: ЕУРОСУПЕР БС – 95 95,00 (денари/литар), ЕУРОСУПЕР БС – 98 97,00 (денари/литар), Дизел гориво ЕУРОДИЗЕЛ БС (Д-Е V) 85,00 (денари/литар), Масло за горење Екстра лесно 1 (ЕЛ-1) 83,50 (денари/литар) и Мазут М-1 НС 54,963 (денари/килограм).
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 0,699%, кај дизелот намалување за 2,684%, кај екстра лесното масло намалување за 2,390% и кај мазутот зголемувањето е за 1,573%, сопшти РКЕ.
Курсот на денарот во однос на доларот во изминатиот период по кој беа формирани цените со претходната пресметка, е понизок за 0,143%.
Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени, потсетуваат од РКЕ.
