Додека губењето на притисокот во три гасоводи меѓу Русија и Германија сè уште официјално се истражува, Берлин, повеќе не е убеден дека тоа е случајност и се сомнева дека е „таргетиран напад“ или од Украина или од Русија, објави во понеделникот весникот Тагесшпигел.
Притисокот во една од линиите Северен тек 2 нагло падна во текот на ноќта, а истото се случи и со двете цевки Северен тек 1 во понеделникот попладне. Данска објави дека е забележано истекување гас во близина на брегот на островот Борнхолм во Балтичкото Море и ја затвори областа за поморски сообраќај, но не може да потврди дали тоа е причината за губење на притисокот.
Според Тагесшпигел, германската влада и агенциите кои го истражуваат инцидентот „не можат да замислат сценарио кое не е насочен напад“.
Изданието објасни дека во намерниот напад на дното на морето мора да бидат вклучени специјални сили, морнарички нуркачи или подморница. Берлин, наводно, испитува две можни сценарија. Во првиот, Украина или „силите поврзани со Украина“ би можеле да стојат зад нападот. Втората опција е Русија да го направи тоа како „лажно знаме“, за да ја обвини Украина и да ги зголеми цените на енергијата во ЕУ.
Со затворен „Северен тек“ од крајот на август, рускиот гас може да се испорачува само до Германија и централна Европа преку постарите цевководи што минуваат низ Полска и Украина, истакна Тагесшпигел.
„Ние сме во процес на разјаснување на ситуацијата овде“, изјави портпаролката на федералното министерство за економија за весникот. „Во моментов не знаеме што го предизвика падот на притисокот“.
Северен тек 1 е изграден во 2011 година. Изградбата на Северен тек 2 започна во 2018 година и траеше многу подолго поради политичкиот притисок и економските санкции од САД. СТ2 беше завршен и под притисок до септември 2021 година. Сепак, два дена пред руската воена операција во Украина, германската влада ја стави својата сертификација на неопределено време и категорично одби каков било предлог од Москва за деблокирање на гасоводот.
