Професорот на Универзитетот во Грац, Флоријан Бибер, по повод иницијативата Отворен Балкан изјави дека идејата за регионална соработка не е лоша, но дека има проблеми бидејќи не се вклучени сите земји од Западен Балкан.
– Идејата за регионална соработка не е лоша, секаков вид соработка е добредојдена, но има проблеми, бидејќи не се сите вклучени, а без целиот Западен Балкан соработката е проблематична – изјави Бибер за Н1.
Тој оценува дека друг проблем е и прашањето за намерите на лидерите кои ја формираа, особено (албанскиот премиер Еди) Рама и (српскиот претседател Александар) Вучиќ, рече Бибер, додавајќи дека проблемот е што не е јасно кој ќе доминира и зошто има нова рамка ако веќе постоеле рамки за соработка.
– Берлинскиот процес имаше своја предност бидејќи ги вклучи членките на ЕУ и тоа е многу важно – додаде тој.
Како што наведе, има сомнежи дека нивните мотиви навистина се регионалната соработка и добрососедските односи.
– Гледаме преку нивните постапки дека ги креваат тензиите во регионот, во таа смисла не можам да верувам дека се за добра соработка. А намерите се повеќе пропаганда, да се продаде на Запад – добри сме, ние сме партнери и со тоа одвраќање од клучните проблеми – недостигот на демократија и владеење на правото – рече Бибер.
Тој потсети дека преговорите со Албанија и Северна Македонија се блокирани од некои земји од ЕУ, додека Србија не е блокирана поради билатерален спор.
– Причина зошто Србија е побавна во тој процес е резултат на внатрешната политика на актуелната власт – вели Бибер.
За тоа дека на состанокот на тројцата лидери преку видео линк ќе им се придружи и европскиот комесар за проширување, Бибер рече дека Оливер Вархеји нема целосна поддршка во ЕУ бидејќи е „јасно дека главно ја застапува политиката на Виктор Орбан кон Западен Балкан, а таа не е идентична со политиката на ЕУ“.
– Тој ја фаворизира Србија на Вучиќ, не можеме да имаме целосна доверба во неговата мотивација. Се чини дека тој повеќе зборува во интерес на неговата родна земја. – Мора да има јасна порака дека Отворениот Балкан има смисла само ако целиот Западен Балкан е таму – рече Бибер.
Зборувајќи за европскиот пат на Западен Балкан, Бибер со став:
Очигледно е дека овој пат нема да заврши со скорешно членство во ЕУ, никој не зборува за 2025 година, тој пат ќе трае, зависи од ситуацијата во регионот и во ЕУ. Има неколку начини – исполни ги условите и ќе бидете член, Унгарија вели биди наш партнер и постапувај како нас и ние ќе се заложиме за членство. Другите земји нема да дозволат такво членство. Сите земји мора да се согласат за членство. И за Германија и за Франција е предизвик да ја реформираат ЕУ и да примат нови членки.
