Итна евакуација на населението започна доцна во вторникот вечерта од подрачјата кои претрпеа големи поплави и свлечишта на карпестиот терен минатиот викенд во северниот дел на Херцеговина, по најавените обилни врнежи.
Како што информираа во текот на ноќта од Кризниот штаб на Херцеговско-неретванската жупанија со седиште во Мостар, евакуацијата на населението од загрозените подрачја Јабланица и Коњиќ е веднаш започната, а ја вршат припадници на цивилната заштита и други служби за итни случаи, со поддршка на спасувачките екипи на теренот.
Во итното известување се наведува дека луѓето мораа да бидат евакуирани од загрозените подрачја најдоцна до 2 часот по полноќ. Тие се сместуваат во претходно организирани колективни прифатилишта во училиштата и спортските сали, каде им се обезбедени кревети, храна, вода и основни средства за хигиена.
Овие мерки се спроведуваат поради предупредувањето на Сојузниот хидрометеоролошки завод кој за ноќта предвиде пообилни врнежи од дожд и до 60 литри дожд на метар квадратен, што може да доведе до нови поројни потоци и одрони во веќе загрозените подрачја.
Најмалку 22 лица загинаа во поплавите и свлечиштата во северниот дел на Херцеговина и централниот дел на Босна и Херцеговина, а се трага по уште осум лица.
