Цените на нафтата паднаа во вторникот на меѓународните пазари, откако закрепнаа повеќе од 7 отсто во претходните три трговски дена поради стравувањата од проширување на конфликтот на Блискиот исток и потенцијалното затворање на повеќето нафтени полиња во Либија.
Цената на барелот на лондонскиот пазар падна за 36 центи во однос на затворањетона тргувањето во понеделникот, на 81,07 долари. На американскиот пазар, пак, со барелот се тргуваше по пониска цена од 40 центи, по 77,22 долари.
Организацијата на земјите извознички на нафта (OPEC) во посебен извештај објави дека во понеделникот цената на барел од референтата нафтена кошничка на нејзините членки пораснала за 1,68 долари, на 79,43 долари.
По скокот на цената на нафтата поради геополитичкиот ризик на Блискиот исток и суспензијата на производството во Либија, учесниците на пазарот сега се претпазливи во проценката на понатамошниот развој, изјави стратегот на пазарот на IG, Јеап Јун Ронг.
Зголемувањето на цената на барелот во претходните три трговски дена во Лондон достигна 7 отсто, а во САД 7,6 отсто. Цените достигнаа највисоко ниво во 2024 година од 91,17 долари во април и оттогаш паднаа поради очекувањата за послаба глобална побарувачка на нафта, особено поради економската слабост во Кина.
Производството повторно започна на либиското нафтено поле Ел Феел, изјавија инженерите за Reuters во вторникот. Во понеделникот, властите во источниот дел на земјата, дом на повеќето нејзини нафтени полиња, се заканија дека ќе го запрат производството и извозот откако се разгореа тензиите околу раководството во централната банка на земјата. Речиси сите 1,17 милиони барели сурова нафта од дневното производство во земјата доаѓаат од овие полиња. Сепак, тоа не беше потврдено ниту од меѓународно признатата влада во Триполи, ниту од „National Oil Corp“, кој ги контролира нафтените ресурси во земјата.
