Во четвртокот, по спорот со Германија околу можните ограничувања за увоз на ловечки трофеи, Боцвана објави план за отстрел на 20.000 слонови.
„Како што знаете, во април оваа година, со сета почит, Боцвана ѝ понуди на Германија 20.000 слонови, но досега не добивме никаков одговор од германската влада“, рече претседателот на оваа африканска земја, Мокгвееци Масиси, во интервју за германски Bild.
Рече дека неговата земја, како и цела јужна Африка, се соочува со „најлошата суша во последните 50 години“ и дека „нашиот народ гладува, а на слоновите им се заканува умирање“.
„Кога луѓето гладуваат, наша должност е да ги нахраниме. И искрено ви велам: тие јадат и слонови“, рече Масиси.
Претседателот на Боцвана не кажа точно кога би можело да започне острелувањето на слоновите.
Претходно во април годинава, германското Министерство за животна средина предложи да има построги ограничувања за увоз на трофеи од лов на животни. Претседателот на Боцвана тогаш изјави за германските медиуми дека ова само ќе ги осиромаши луѓето во неговата земја.
Во заднината на ситуацијата е жестока дискусија која започна пролетта годинава за евентуални дополнителни ограничувања на увозот на ловечки трофеи. Германската министерка за животна средина Штефи Лемке се смета за поборник на овие ограничувања и е на удар на претставниците на африканските земји, особено од Боцвана.
Боцвана е загрижена за натамошни ограничувања на увозот на ловечки трофеи поради големи финансиски загуби. Во атмосфера на растечки тензии, претседателот Масиси изјави дека сака да испрати 20.000 слонови во Германија во знак на протест, но тоа не се случи.
Масиси вели дека бројот на слонови експлодирал како резултат на напорите за зачувување, а ловот помогнал да се задржат под контрола.
Германците треба „да живеат заедно со животните, на начинот на кој вие се обидувате да ни кажете. Ова не е шега“, изјави Масиси за Bild.
Боцвана е дом на околу една третина од светската популација на слонови – над 130.000 – повеќе отколку што има простор. Стадата предизвикуваа штета на имотите, се хранат со посевите и газат жители, рече Масиси.
Боцвана претходно ѝ подари 8.000 слонови на соседна Ангола и понуди уште стотици на Мозамбик, како средство за намалување на популацијата.
„Би сакале да ѝ понудиме таков подарок на Германија“, рече Масиси, додавајќи дека нема да прифати „не“ како одговор.
Министерот за диви животни на Боцвана, Думезвени Мтимхулу полетва се закани дека ќе испрати 10.000 слонови во лондонскиот Хајд парк за Британците да можат да „почувствуваат како се живее крај нив“.
Во март годинава, британските пратеници гласаа за поддршка на забраната за увоз на ловечки трофеи, но законодавството треба дополнително да се испита пред да стане закон. Ветувањето за забрана за увоз на ловечки трофеи беше вклучено во општиот изборен манифест на тогаш владејачките конзервативци во 2019 година.
Боцвана и другите јужноафрикански земји заработуваат многу пари од богатите поединци од западните земји кои плаќаат илјадници долари за дозвола да застрелаат животно, а потоа ја земаат неговата глава или кожа како трофеј. Тие велат дека овие пари се користат за да им се помогне на напорите за зачувување и на локалното население, па затоа е помала веројатноста да бидат во искушение да ги ловат животните.
Групите за права на животните тврдат дека оваа практика е сурова и треба да се забрани.
„Во некои области има повеќе од овие ѕверови отколку луѓе. Тие убиваат деца кои им се испречуваат на патот. Ги газат и јадат земјоделските посеви, оставајќи ги Африканците гладни“, оцени неодамна министерот за диви животни на Боцвана.
Германија е најголемиот увозник во ЕУ на трофеи за африкански слонови и трофеи за лов во целина, според извештајот на Humane Society International за 2021 година.
Боцвана ја забрани оваа практика во 2014 година, но ги укина ограничувањата во 2019 година откако се соочи со притисок од локалните заедници. Земјата сега издава годишни ловни квоти, велејќи дека е лиценцирана и строго контролирана.
Претходно размислуваше да користи слонови за храна за домашни миленици.
Портпаролката на Министерството за животна средина во Берлин изјави за новинската агенција AFP дека Боцвана не изразила никаква загриженост со Германија за ова прашање.
„Со оглед на алармантното губење на биолошката разновидност, имаме посебна одговорност да сториме се за да обезбедиме одржлив и легален увоз на ловечки трофеи“, рече таа.
Министерството, сепак, остана во разговори со африканските земји погодени од правилата за увоз, вклучително и Боцвана, рече портпаролката.
Австралија, Франција и Белгија се меѓу земјите кои ја забранија трговијата со ловечки трофеи.
Боцвана, заедно со нејзините соседи Зимбабве и Намибија, исто така тврдат дека треба да и се дозволи да ги продава своите резерви од слонова коска за да може да заработи пари од огромниот број слонови.
Земјите во Источна Африка, како и групите за заштита на животните, се спротивставија на ова, велејќи дека тоа ќе го поттикне ловокрадството.
