Британскиот премиер Риши Сунак во средата најави дека парламентарните избори ќе се одржат на 4-ти јули, порано од очекуваното, а по 14 години конзервативно владеење, речиси е сигурно дека ќе победи Лабуристичката партија.
Завршувајќи ги повеќемесечните шпекулации за тоа кога ќе распише избори, 44-годишниот Сунак објави пред неговата канцеларија во Даунинг стрит дека изборите ќе се одржат на почетокот на јули, што може да се покаже како ризична стратегија со оглед на тоа што неговата партија заостанува зад лабуристите во анкетите.
„Сега е моментот Британија да ја избере својата иднина. Ќе имаме општи избори на 4-ти јули“, рече Сунак.
Не само што Сунак влегува во изборите зад Лабуристите на анкетите, туку тој е практично изолиран од неговата партија и сè повеќе зависи од мал тим советници кои ќе го водат низ она што може да биде немилосрдна кампања.
Сунак, сепак, оцени дека ризикот вреди со оглед на некои позитивни економски движења, како што се падот на инфлацијата и најбрзиот економски раст во последните три години. Токму оваа агенда ќе ја претстави пред гласачите во борбата за нов мандат.
Поранешниот инвестициски банкар и министер за финансии пред нешто помалку од две години седна во премиерската фотелја и оттогаш не успеа јасно да дефинира за што се залага. Во исто време, тој е сѐ повеќе фрустриран, бидејќи, како што гледа, неговите успеси не се ценат.
Двете партии, кога е во прашање кампањата, цврсто се на стартните позиции од каде што го почнуваат судирот, пред сѐ во делот на економијата и одбраната.
Сунак и неговата влада ги обвинуваат лабуристите дека ако ја освојат власта, веднаш ќе ги зголемат даноците и дека не ја гарантираат безбедноста на луѓето во сѐ поопасниот свет, бидејќи немаат безбедносен план. Лабуристите, од друга страна, возвраќаат со обвинувања за лошо управување со економијата во текот на сите 14 години владеење на конзервативците и тврдат дека луѓето се влошуваат.
Ако лабуристите победат, Британија, некогаш позната по својата политичка стабилност, ќе има шест премиери за осум години, што е прв пат од 1830-тите.
Лабуристите инсистираат дека се повеќе од подготвени за избори и дека земјата „вика за општи избори“.
