Британската принцеза Ана, помладата сестра на кралот Чарлс Трети, е отпуштена од болница, објави во петокот Бакингемскиот дворец, откако таму мина пет ноќи со мала повреда на главата за која се верува дека била предизвикана од коњ.
Палатата соопшти дека 73-годишната, единствената ќерка на покојната кралица Елизабета Втора, се вратила восвојот дом во Геткомб Парк во југозападна Англија, каде што ќе се закрепнува и ќе се врати на своите јавни должности кога ќе дозволи нејзиниот лекарски тим.
„Би сакала да изразам најтопла благодарност до целиот тим во болницата Саутмед за грижата, стручноста и љубезноста за време на краткиот престој на мојата сопруга“, рече нејзиниот сопруг Тим Лоренс.
Ана се повредила во неделата додека се движела по својот имот. Коњи биле во близина во моментот на инцидентот, а нејзиниот медицински тим рекол дека повредите на главата биле во согласност со удар од глава или нога на коњот.
Извор од близина на британското кралско семејство изјавил дека Ана, поранешна олимписка коњаничка, доживеала потрес на мозокот и не се сеќава што се случило.
Од Дворецот во понеделникот соопштија дека се очекува таа целосно да се опорави од повредата.
