За „Невидливото малцинство во Грција“ освен грчка, Би-Би-Си доби и бугарска „нота“. Ако за грчката беше задолжен грчкиот амбасадор во Лондон, бугарската пристигна од партијата на Бојко Борисов, поточно од европратеникот Андреј Ковачев, кој на Британците им објасни дека „невидливото“ малцинство е всушност бугарско.
„Бев особено изненаден кога пред неколку дена ја прочитав статијата ‘Невидливото малцинство на Грција – македонските Словени’, објавено на вебстраницата на Би-Би-Си. Текстот се занимава со многу важна тема – историските малцинства во северна Грција. Тоа навистина беше табу многу децении. Сепак, историскиот преглед на темата на Балканските војни до денес има голем недостаток. Не постои сомнеж за етничката припадност на негрчките заедници кои живеат на сегашните територии на северна Грција, регионите на Тракија и Македонија. Тие се етнички Бугари не само според светската научна заедница, туку и според грчките историски и архивски документи, пишува во писмото упатено до извршниот директор на Би-Би-Си, Тони Хол Ковачев, член на Европска народна партија (ЕПП) од редовите на ГЕРБ.
Во децениите по балканските војни локалното население е подложено на тешка асимилација, делумно преку насилство, делумно преку јавен и културен притисок. По Втора светска војна, Титова Југославија имаше многу подобар пристап до потомците на Бугарите во регионите што сè уште ги населуваат. Некои од нив успешно се инфилтрираа во идејата за македонска етничка припадност.
Во ова писмо би сакал да се фокусирам на погрешното толкување на приказната во вашата статија. Затоа би сакал да го насочам вашето внимание на неколку достапни извори на темата:
Карнегиевата анкета, како што е популарното име на Извештајот на меѓународната комисија за истражување на причините и на одвивањето на Балканските војни;
Книгата на Васил Канчов ‘Македонија – етнографија и статистика 1900’;
Протоколот ‘Калфов – Политис’, потпишан по Тарлискиот инцидент, кога во селото Тарлис, планинско село во демата Неврокоп, Грција, 17 селани од бугарско потекло биле убиени од грчки офицер;
Договорот Молов-Кафандарис, потпишан меѓу Бугарија и Грција, кој се однесува на размената на бугарското и на грчкото население;
Мислам дека Би-Би-Си е еден од најсериозните медиуми на светската сцена. Затоа се надевам дека внимателно ќе ја разгледате вашата статија и ќе ги поправите неточностите, вели Ковачев во писмото.
