Британскиот крал Чарлс Трети и кралицата Камила пристигнаа во Франција во средата во тридневна државна посета и заедно со францускиот претседател Емануел Макрон се надеваат дека ќе свртат нова страница со симболика и лични врски по години хаотични односи меѓу двете земји.
Авионот слета на парискиот аеродром „Орли“, а Чарлс III и Камила таму ги пречека француската премиерка Елизабет Борн. Кралската двојка потоа замина кон Триумфалната капија, каде што Чарлс III и францускиот претседател Емануел Макрон ќе положат венци на гробот на непознатиот војник.
Парижаните имаат измешани чувства за посетата. „Тој е само син, веќе се стари, немаме долга историја“, вели пензионерката Миреј Мов. Чарлс „едноставно не е толку симпатичен“ (како неговата мајка, покојната кралица Елизабета).
Други веруваат дека ќе се појави ентузијазам.
„Мислам дека Французите ќе бидат помалку рамнодушни кога кралот ќе пристигне и кога ќе почнат извештаите во медиумите“, изјави Парижанецот Ерик Фрици. „Покрај тоа, тој многу се занимава со екологија, популарна тема, па луѓето ќе го слушаат“, додаде тој.
„Со нетрпение очекуваме да ви се придружиме во Париз и Бордо додека ја започнуваме нашата прва државна посета на Франција како крал и кралица, земја за која и двајцата имаме најголема љубов и восхит. Ќе ја прославиме посебната врска меѓу нашите земји и сите што може да го понуди вашата прекрасна земја. Франција, се гледаме наскоро!“, објавија на платформата X, Чарлс III и Камила на англиски и француски, заедно со видео од влегувањето на кралот во авионот.
„Ја посетивте (Франција) како принц, се враќате како крал. Ваше височество, добредојде“, напиша Макрон на англиски на платформата Х, заедно со видеото од неговите претходни посети на Франција.
Патувањето ќе биде проткаено со симболика бидејќи Обединетото Кралство и Франција се обидуваат да ги обноват односите по горчливите и хаотични години по излегувањето на Британија од Европската унија.
Во среда во Версај ќе се одржи државната вечера, а на банкетот се поканети повеќе од 150 гости.
Британскиот актер Хју Грант, француската актерка Шарлот Генсбург, британската рок ѕвезда Мик Џегер, британскиот писател Кен Фолет, британската актерка Ема Меки, извршниот директор на француската компанија LVMH Бернард Арно, поранешниот француски фудбалски тренер Арсен Венгер, француската фудбалска ѕвезда Дидие Дрогба се само неколку имиња од списокот на гости поканети на државната вечера, открија од кабинетот на францускиот претседател.
Во четврток, Чарлс и Камила, францускиот претседател и неговата сопруга Брижит ќе ја посетат катедралата Нотр Дам за да ги видат реставраторските работи по големиот пожар во 2019 година што го уништи нејзиниот покрив. Британската кралска двојка потоа ќе се упати во југозападниот град Бордо во петок.
