Бројот на загинати од силниот земјотрес што ја погоди Јапонија на почетокот од новата година се искачи на 64 во средата, додека властите се обидуваат да им помогнат на преживеаните во услови на ниски температури и обилни дождови.
Земјотрес со јачина од 7,6 степени според Рихтеровата скала го погоди полуостровот Ното во понеделникот попладне, уривајќи куќи и отсечени оддалечените области од многу потребната помош.
За среда се предвидуваа обилни дождови во областите погодени од земјотресот, што ги зголеми стравувањата од лизгање на земјиштето и може дополнително да ги попречи напорите за спасување на голем број луѓе затрупани под урнатините.
Многумина беа повредени, а властите се бореа со пожарите во неколку градови и извлекоа луѓе од урнати згради во вторникот.
Според јапонската метеоролошка агенција, од првиот земјотрес во понеделникот се регистрирани околу 200 последователни потреси. Агенцијата предупреди дека во наредните денови може да има уште посилни земјотреси.
Од понеделникот во Јапонија се случија повеќе од 300 земјотреси со различна јачина, од кои најмоќниот беше со јачина од 7,6 степени. Заканата од цунами за целиот западен брег на земјата остана на сила повеќе од 20 часа. Земјотресот беше најмоќниот што го погоди овој дел на Јапонија од 1885 година. Сеизмолозите предупредуваат дека последователните потреси во регионот ќе продолжат околу една недела, а постои ризик од нови силни земјотреси над 7 степени.
