Бугарија се најде на врвот во Европа според рангирањето на кредитирањето на домаќинствата, откако беше обелоденето дека земјата имала најниски стапки на хипотекарните заеми на континентот во 2023 година, покажува новото истражување на компанијата „Делоит“.
Просечната каматна стапка за бугарските граѓани на кредитите дадени минатата година изнесувала само 2,58 отсто. За споредба, Полјаците плаќале во просек по 8,08% на хипотеките, Романците – 7,70%, Унгарците – 7,40%.
Во Србија и Чешка, исто така, можат само да сонуваат за нашите каматни стапки – каде се пријавени доста високи стапки од 6,76% и 5,90%.
Евтини хипотеки минатата година имаше во Белгија (просечна каматна стапка 3,33%), Хрватска (3,26%) и Шпанија (3,45%).
Авторите на студијата забележуваат дека сликата во Европа е прилично „шарена“ и не даваат објаснување за бугарскиот феномен, пренесува „Сега.бг.њус“.
Тие само забележуваат дека кредитниот пазар во секоја земја зависи од „букет“ на фактори – достапност на станови, ниво на задолженост на домаќинствата, финансиска писменост на населението итн. Впрочем, ниските каматни стапки на кредитите во Бугарија често се предмет на анализи и коментари. И бидејќи омилената инвестиција на просечниот Бугарин е во станови (стан, куќа, вила), а каматите на кредитите се невидено ниски, луѓето земаат кредити и масовно купуваат имоти.
