Бугарското министерство за надворешни работи изрази загриженост за како што вели во соопштението, последните постапки на македонскиот претседател Стево Пендаровски. Во него е посочено дека постапки на одредени функционери кои изнесуваат негативни ставови во јавноста и кои се во спротивност со позитивната клима создадена од активните напори на владите на Бугарија и Северна Македонија.
„Неколку дена по успешната заедничка средба на владите на двете земји, повторно сме сведоци на зголемување на тензиите во јавноста предизвикани од конкретни постапки на претседателот на Северна Македонија, кој се обидува да ги обнови темите кои се во спротивност со Договорот за пријателство, добрососедство и соработка од 2017 година. Ваквите дејствија не придонесуваат за изнаоѓање решенија за политички прашања во насока на забрзување на процесот на европска интеграција на Северна Македонија и на меѓусебна доверба“, се вели во соопштението.
До ова доаѓа по вчерашната средба на Пендаровски со претставници на ОМО „Илинден“ и претставници на неколку други здруженија на граѓани од Република Бугарија во претседателската вила Водно.
