Земјите од Групата седум (Г7) и Австралија се согласија да постават капак, односно фиксна цена за руската нафта наместо променлива стапка поврзана со индексот на цената на нафтата, објави Ројтерс, цитирајќи анонимни извори.
Според извештајот, вистинската цена сè уште не е одлучена, но ќе биде во наредните недели. Цената редовно ќе се ревидира, а во иднина може да се ревидира доколку коалициските партнери увидат дека тоа е неопходно.
– Коалицијата се согласи дека ограничувањето на цената ќе биде фиксна цена што ќе се ревидира редовно, наместо попуст на индексот… Ова ќе ја зголеми стабилноста на пазарот и ќе ја поедностави усогласеноста за да се минимизира товарот на учесниците на пазарот – изјавил еден од изворите.
Изворот додал дека поврзувањето на цената со индексот на цената на нафтата, на пример, меѓународниот репер за Брент, кој беше една од опциите за кои се дискутираше, може да доведе до зголемена нестабилност и да го намали посакуваниот ефект на ограничувањето. На пример, ако Брент почне да расте поради помалата понуда на пазарот, ограничувањето соодветно ќе се зголеми, што ќе ѝ биде од корист на Русија.
Земјите од Г7 веќе со месеци разговараат за ограничување на цената на руската нафта, планирајќи ја мерката за намалување на профитот на Русија од извозот на нафта без да се оштети снабдувањето. Ограничувањето треба да стапи на сила на 5 декември за нафтата и на 5 февруари следната година за нафтените деривати.
Русија, меѓутоа, постојано повторува дека нема да продава нафта на земјите кои воведуваат ограничувања на цените. Амбасадорот на Москва во Вашингтон, Анатолиј Антонов, неодамна предупреди дека ограничувањата на цените може дополнително да ја влошат глобалната енергетска криза.
„Рецептот за „зачувување на образот“ развиен во Министерството за финансии, таканареченото „ограничување на цената“ на руската нафта, ја води глобалната економија до уште помрачни агли на овој вид лавиринт на Кносос. Во исто време, ветената нишка на Аријадна, нашата подготвеност да го продадеме „црното злато“ со загуба, не беше ништо повеќе од мит од самиот почеток. Нема да им обезбедуваме благосостојба на другите на наша (руска) сметка. Нема да продаваме ресурси на оние кои вештачки ги држат цените“, напиша дипломатот во напис за магазинот Нешнл Интерест.
