Цените на нафтата пораснаа на меѓународните пазари кон 94 долари за барел, откако Организацијата на земјите извознички на нафта (OPEC) и нејзините сојузници независни големи производители предводени од Русија познати како OPEC+ одлучија да го намалат производството на дневно ниво најмногу од почетокот на пандемијата на коронавирусот во 2020 година, и покрај противењето на САД и стеснетото снабдување.
На лондонскиот пазар цената на барелот во раното попладневно тргување беше повисока за 1,77 долари отколку на вчерашното затворање на тргувањето и изнесуваше 93,57 долари. На американскиот пазар, пак, со барелот се тргуваше по 1.49 долари повисока цена од вчера, од 88,01 долари.
Одвоени OPEC објави дека барелот од кошницата референтна нафта на нејзините членки во вторникот поскапел за 1,45 долари, на 92,13 долари.
Трговците на нафтените пазари денеска со нетрпеливост го исчекуваат состанокот на OPEC и нејзините сојузници во Виена на кои се одлучуваше за политиката на производство. Заедничкиот министерски комитет за мониторинг (JMMC) договори дека производството од ноември ќе биде намалено за два милиона барели дневно во однос на референтната вредност, изјавија за медиумите три извора од OPEC+.
Тоа значи дека намалувањето, сепак, ќе биде поскромно имајќи предвид дека оваа групација земји во август заостануваше зад зададеното ниво на производство за околу 3,6 милиони барели дневно, според Reuters.
Сѐ уште не е јасно дали бројката за кастрење на производството го вклучува и евентуалното доброволно намалување на производството во некои земји членки на групацијата. Некои аналитичари тврдат дека OPEC+ со тоа всушност само официјално го потврдува и онака намалениот обем на производството во изминатите месеци.
„Вистинските последици од намаленото производство ќе бидат поблаги, имајќи предвид дека некои членки не успеваат да ги реализираат производствените квоти“, толкува за Reuters Фиона Чинкота од „City Index“.
Со овој потег OPEC+ така ги отфрли сугестиите и барањата од САД да не го намалува значително производството, според наводите на неименувани извори. Тие велат дека на американскиот претседател Џо Бајден не му одговара раст на цените на бензините во пресрет на изборите за Конгресот кои ќе се одржат на 8-ми ноември.
Бајден цела година се обидува да ги намали цените на бензините во САД, кои по енормниот скок во март се во надолна линија, што неговиот кабинет го претставува како големо достигнување.
„САД мора да бидат помалку зависни од нафтата на OPEC+ и другите странски произведувачи на нафтата“, изјави портпаролот на Белата куќа, Џон Кирби, по состанокот на проширениот картел.
