Цената на нафтата надмина 75 долари на меѓународните пазари во четвртокот, што го означи почетокот на периодот на шпекулации пред претседателските избори во САД и зголемена нервоза поради новите израелски напади во Либан и Сирија.
На лондонскиот пазар цената на барелот во попладневото тргување беше за 46 центи повисока отколку на затворањето на тргувањето ден претходно и изнесуваше 75,42 долари. Во средата го затвори тргувањето со загуба од 1,08 долари.
На американскиот пазар со барелот денеска се тргуваше по 39 центи повисока цена, по 71,16 долари. Вчера тргувањето го затвори во минус за нешто помалку од еден долар.
Организацијата на земјите извознички на нафта (OPEC) одделно објави дека во средата барелот од референната нафтена кошничка на нејзините членки поскапе за 99 центи на 74,47 долари.
Трговците беа затекнати од остриот скок на американските залихи во средата. Според официјалните податоци, залихите на нафта минатата седмица се зголемени за дури 5,5 милиони барели, а намалени се и резервите на бензин, за нешто помалку од еден милион барели.
Во четвртокот, загриженоста за знаци на послаба побарувачка отстапи место за шпекулации пред претседателските избори и пресметката меѓу Доналд Трамп и Камала Харис.
„Трамп е пред Харис според сегашните податоци од обложувалниците и тој предлага главен снабдувач на нафта да бидат САД“, смата Келвин Вонг од OANDA. „Доколку тоа се случи, цените би можеле да паднат“, додава Вонг.
Обложувачите го фаворизираат Трамп, а некои анкети покажуваат дека разликата е многу мала, а резултатот е неизвесен.
Трговците ја следат и ситуацијата на Блискиот исток. Седмицава израелски воени авиони неколкупати ја нападнаа либанската престолнина Бејрут, како и сирискиот главен град на Дамаск. Тел Авив, исто така, започна копнена офанзива против Либан, а Хезболах одговори со ракети и активирани трупи.
Трговците се уште го чекаат најавениот одговор од Тел Авив за нападот со балистички проектили на Иран врз воени цели во Израел. Техеран одговори со проектили на израелското бомбардирање на Бејрут, во кое загинаа стотици цивили и група воени и политички претставници на Хезболах.
