Цените на нафтата на меѓународните пазари во четвртокот паднаа кон 91 долар за барале, имајќи предвид дека загриженоста за снабдувањето во втор план ги потиснаа прогнозите за послабата побарувачка и посилниот долар пред потенцијалното значително подигнувањето на каматните стапки во САД.
Цената на барелот сирова нафта на лондонскиот пазар во раното попладневно тргување подна за 2,27 долари во однос на затворањето на претходниот трговски ден, на 91,38 долари. На американскиот пазар со барелот се тргуваше по 1,63 долари пониска цена од вчера, од 86,85 долари.
Организацијата на земјите извознички на нафта (OPEC) во одвоен извештај објави дека барелот на кошницата референтна нафта на нејзините членки во средата поевтинил за 79 центи, на 97,66 долари.
Трговците и денеска беа фокусирани на процената на Меѓународната агенција за енергија (IEA), дека побарувачката на нафта ќе стагнира во четвртиот квартал годинава поради сѐ поизразеното економско забавување и подзапирање на активностите во Кина под притисокот на строгите мерки за сузбивање на коронавирусот.
Тег за ценитe и денеска преставува силниот американски долар, поддржан од очекувањата дека американската централна банка Federal Reserve (Fed) следната седмица повторно значително ќе ги подигне клучните каматни стапки, можеби и за цел процентен поен, за да го запре јакнењето на инфлацијата. Посилниот долар ја слабее куповната моќ за купувачите кои поседуваат други валути.
„Движењето на цените на нафтените пазари моментално го диктираат многу фактори, меѓу кои особено се истакнува економската неизвесност, а потенцијален неповолен фактор е и посилниот долар“, вели за Reuters Крег Ирлам од OANDA.
Загриженоста за побарувачката ги потисна во втор план стравувањата дека обновениот судир меѓу Ерменија и важниот произведувач на нафта Азербејџан најавува нова закана за снабдувањето, по најавите за ценовниот лимит на руската нафта и застојот во преговорите за иранската нуклеарна програма.
Висок ерменски функционери ги стивна стравувањата, изјавувајќи во средата ноќта дека е постигнат договор за примирје на спорната област Нагорно Карабах.
Резервите од сирова нафта во САД пораснале минатата седмица за 2.4 милиони барели, покажаа во средата официјалните податоци, поттикнати од продажбата на нафтата од стратешките резерви во рамките на програмата која би требало да заврши во октомври.
