Цените на нафтата паднаа за повеќе од два долари во петокот, откако серијата лоши макроекономски показатели од Кина ја засенија геополитичката ситуација на Блискиот исток.
На лондонскиот пазар со барел сурова нафта во петокот се тргуваше по цена пониска за 2,19 долари, од 78,85 долари. На американскиот пазар цената на барел сурова нафта е пониска за 2,39 долари, од 75,55 долари.
Цените на нафтата на двата пазари сега се во минус од почетокот на семицата, моментално лондонскиот пазар е во минус за еден процент оваа недела, а оние на американскиот пазар за 1,4 отсто.
Организацијата на земјите извознички на нафта (OPEC) објави дека во четвртокот цената на барелoт од референтната нафтена кошничка на нејзините членки паднала за 14 центи, на 79,93 долари.
„Пазарот на нафта се бори да ја задржи неодамна обновената цена од 80 долари за барел бидејќи низа слаби макроекономски показатели поттикнаа загриженост за економскиот раст на Кина, додека во исто време геополитичките грижи сега исчезнуваат“, рече шефот на истражувањето на „Onyx Capital Group“, Хари Чилингвиријан.
Кинескиот премиер Ли Кианг изјави на пленарната седница на владата во петокот дека мора да се направат големи напори за стимулирање на економијата и дека земјата ќе се фокусира на зајакнување на потрошувачката, објавија државните медиуми.
Податоците објавени во четвртокот покажаа дека кинеската економија изгубила динамика во јули – индустриското производство забави, невработеноста се зголеми и цените на новите станови паднаа со најбрзо темпо во последните девет години. Кинеските рафинери, исто така, остро го намалија производството на сирова нафта минатиот месец, бидејќи побарувачката за горива ослабе.
