Цените на нафтата останаа под нивото од 77 долари на меѓународните пазари во понеделникот, бидејќи трговците се фокусираа на планираното зголемување на понудата од главните производители и на проценките за можно забавување на побарувачката во Кина и САД.
На лондонскиот пазар цената на барелот по пладне беше речиси непроменета во однос на затворањето на трговијата на крајот на минатата недела и изнесуваше 76,73 долари. Во петокот ја затвори трговијата со загуба од 1,14 долари.
Позначителни ценовни промени денеска немаше ниту на американскиот пазар, каде барелот се тргува по 73,36 долари. Минатиот петок ја затвори трговијата со загуба од 2,36 долари.
Одделно, Организацијата на земјите извознички на нафта (OPEC) објави дека барелот од референтната нафтена кошница на нејзините членки во петокот поскапе за 65 центи на 78,75 долари.
На крајот на минатата недела, расположението на пазарот го одбележаа информациите од шест извори во OPEC и меѓу нејзините сојузници дека групата планира да ја зголеми понудата од октомври, како што најави, проценувајќи дека понудата ќе зајакне кон крајот на годината.
Според планот на OPEC+, осум членки треба да го зголемат производството за 180.000 барели дневно во октомври. Тоа би значело дека од почетокот на четвртиот квартал до крајот на 2025 година, групата би ја намалила понудата за приближно два милиони барели дневно.
Планираното зголемување на понудата ги кочи цените и на почетокот од оваа седмица.
„Се стравува дека групацијата би можела уште повеќе да го зголеми производството, па понудата би била уште повеќе пред побарувачката, а резултатите би биле уште пониски цени на нафтата“, објаснува Ахилеас Георгопулос од брокерската куќа XM.
Поизразеното зголемување на производството би можело да се совпадне со забавувањето на светската економија, со загрижувачки податоци од Кина, додава Георголобулос.
Активноста во кинеската индустрија, исто така, падна во август, на најниско ниво во последните шест месеци, со пониски производни цени и послаба побарувачка, според индексот PMI што го составија заводот за статистика и Кинеската асоцијација за логистика и снабдување.
„Кинескиот PMI, објавен во текот на викендот, беше послаб од очекуваното, поттикнувајќи ги стравувањата дека кинеската економија нема да ги достигне целите за раст“, рече Тони Сајкамор од IG.
Послабата економска активност во Кина би значела и послаба побарувачка од најголемиот увозник во светот и би следела по индикациите за послаба потрошувачка во САД.
Така, потрошувачката на нафта во САД во јуни падна на најниско ниво во летната сезона од пандемијата на ковид-19, покажаа во петокот податоците на Министерството за енергетика.
