Цените на нафтата на меѓународните пазари во четвртокот пораснаа кон 102 долари, поттикнати од најавите на произведувачите дека би можеле да го намалат снабдувањето и од падот на резервите во САД.
Цената на барелот на лондонскиот пазар порасна за 60 центи во однос на затворањето на претходниот трговски ден, на 101,82 долари. На американскиот пазар, пак, со барелот се тргуваше по речиси непроменета цена од 95,05 долари.
Организацијата на земјите извознички на нафта (OPEC) во засебно соопштение денеска објави дека барелот на кошницата референтна нафта на нејзините членки во средата чинел 104,05 долари, што значи дека поскапел за 2,12 долари.
Поддршката на цените и денеска им даде изјавата на саудискиот министер за енергетика, принцот Абдулазиз бин Салман, од почетокот на седмицава дека пазарот на терминските договори се одвоил од физичкиот пазар, што сигнализира дека водечките производители би можело да го намалат снабдувањето.
„Изјавата дека цените не се усогласени со темелните показатели и дека OPEC+ би можел да го намали производството, очигледно ги постигна посакуваниот ефект“, вели за Reuters аналитичарот Крег Ирлам.
Расположението на пазарот го подобри и падот на резервите на сирова нафта во САД минатата седмица. Нафтените резерви паднале за 3,3 милиони барели, а резервите на бензините за само 27.000 барели, што го ограничи растот на цените на американскиот пазар.
Тег за цените и денеска претставуваа и преговорите за иранската нуклеарна програма. Иран објави дека го примил одговорот на САД на „конечниот“ текст предложен од ЕУ за обновување на договорот од 2015 година. Евентуалното постигнување договор би создал услови за враќање на пазарите на санкционираната иранска нафта.
