Англискиот фудбалски шампион Челзи во одбраната на титулата ќе тргне во новата сезона со натпреварот против Барнли, на домашен терен во првото коло од новата сезона којашто започнува на 12 август.
Распоредот на натпреварите во сезоната 2017/2018 е објавен во средата, а Челзи веќе во второто коло го очекува дерби меч, кога ќе се сретне со градскиот ривал Тотенхем кој годинава своите домашни натпревари ќе ги игра на „Вембли“ додека трае реконструкцијата на „Вајт Харт Лејн“.
И годинава кандидатот за шампионската титула Манчестер Сити во првото коло патува на гости кај новиот прволигаш Брајтон, додека градскиот ривал Манчестер Јунајтед на својот „Олд Трафорд“ ќе го дочека Вест Хем Јунајтед.
Ливерпул ќе гостува кај Ватфод, додека Тотенхем кај Њукасл Јунајтед.
Уште еден нов прволигаш Хадерсфилд Таун, својот прв меч во најсилната англиска фудбалска лига во 45 години ќе ја игра на гости кај Кристал Палас. Арсенал, пак, дома ќе го пречека Лестер Сити.
Евертон, кој првиот меч од новата сезона ќе го игра против Сток Сити, има најтежок распоред на почетокот, бидејќи до крајот на септември го очекуваат дуелите со Манчестер Сити, Челзи, Тотенхем и Манчестер Јунајтед.
Првото коло го заокружуваат Свонси Сити кој патува кај Саутемптон, и Бормут кој гостува кај Вест Бромвич Албион.
Првиот годинашен судир меѓу Манчестер Јунајтед и Ливерпул, еден од најисчекуваните дуели секоја сезона, ќе се игра на „Енфилд“ на 14 октомври.
