Чешката иницијатива за купување муниција за Украина во нејзината војна против Русија досега собрала доволно средства за првите 300.000 артилериски гранати, објави во петокот чешкиот премиер Петр Фиала на социјалната мрежа Х.
„Нашата цел е да испратиме многу повеќе! Нашата работа и нашата помош за Украина не завршува тука. Ние продолжуваме да бараме партнери за да можеме да продолжиме да ја поддржуваме Украина во нејзината храбра борба против рускиот агресор“, рече Фиала.
Чешкиот претседател Петр Павел изјави во четвртокот дека иницијативата ја собрала сумата потребна за купување на 800.000 парчиња муниција што претходно биле пронајдени во неименувани земји надвор од Европа.
Во четвртокот вечерта, откако Павел објави дека средствата се собрани, чешките медиуми цитираа владин советник дека сѐ уште нема доволно пари за купување на сите 800.000 парчиња и дека самата иницијатива нема одредена сума.
Павел минатиот месец рече дека 500.000 куршуми од 155 милиметарска муниција и 300.000 куршуми од 122 милиметарска муниција се достапни и дека може да бидат испорачани доколку се обезбедат средства.
Неколку земји-членки на Европската унија и земји надвор од блокот ветија дека ќе донираат средства за украинска муниција, бидејќи руската инвазија влегува во третата година а линијата на фронтот бавно но континуирано се повлекува кон централна Украина.
Иницијативата на Прага доаѓа во време кога ЕУ нема да ја исполни својата стара цел да испорача еден милион парчиња муниција на Украина овој месец и во време кога американската воена помош, која е столбот на меѓународната поддршка за Киев, е запрена.
Во четвртокот Норвешка соопшти дека ќе донира до 1,6 милијарди норвешки круни (околу 141 милион евра) на чешката иницијатива, откако Германија и Франција го сторија истото оваа седмица.
