Високата претставничка за надворешна и безбедносна политика на Европската унија Федерика Могерини, на заедничка средба со заменик-претседатеот на Владата на Република Македонија задолжен за евроинтеграции Фатмир Бесими и со министерот за надворешни работи Никола Попоски, попладнево во Брисел им честиташе во име на Советот на Европската унија на постигнатиот договор 15 јули со кој е ставен крај на политичката криза во земјата.
Како што јави дописникот на МИА од Брисел, Могерини, Бесими и Попоски одржаа кус состанок пред Советот за стабилизација и асоцијација меѓу Унијата и Македонија, што моментно е во тек и се очекува да трае два-три часа.
– Навистина ви честитам од срце. Направивте одличен договор за доброто на Македонија, им порача Могерини на двајцата високи претставници на македонската Влада, што можеа да го слушнат и присутните новинари и членови на делегациите.
Пораката што во име на Советот на ЕУ им ја испратила Могерини на македонските министри Бесими и Попоски е дека официјален Брисел сега очекува политичките партии во Македонија во целост да го усвојат договорот и на крајот земјата да има успешни предвремени парламентарни избори на 24 април 2015 година. Успешната реализација на сето ова, како што пренесе и хрватската министерка за надворешни работи Весна Пусиќ во изјава за МИА, шефовите на дипломатиите на ЕУ-земјите се подготвени да го наградат со отворање на пристапните преговори на Македонија со ЕУ, како и влез на земјата во НАТО на Самитот во Варшава идната година.
