Директорот на ЦИА Вилијам Барнс вчера во Варшава се сретна со премиерот на Катар, Мохамед бин Абдулрахман ал-Тани и со шефот на израелската разузнавачка служба Мосад, Дејвид Барни, за да разговараат за можноста за нов договор за ослободување на израелските заложници држени од милитантната група Хамас во Појасот Газа, објави Ројтерс.
„Израелските власти тврдат дека континуираното учество на Барни во преговорите е од клучно значење за постигнување на каков било нов договор“, објави Ројтерс повикувајќи се на порталот Аксиос.
Американскиот секретар за одбрана Лојд Остин вчера пристигна во Израел и се очекува да разговара со израелските власти за можното намалување на интензитетот на нападите на израелската армија врз Појасот Газа и транзиција кон поограничен конфликт.
Тој силно го поддржа правото на Израел да се брани по нападот на Хамас на 7 октомври, но укажа и на големиот број цивилни жртви во Газа. Висок американски функционер им рече на новинарите кои патуваа со Остин дека ќе разговара со израелските власти за плановите Израел да премине во следната фаза од војната. Официјалниот претставник истакна дека САД имаат интерес да го поддржат Израел во ставањето крај на големите копнени операции во Појасот Газа и да премине во нова фаза.
Турската влада не ги коментираше извештаите за наводна средба со претставници на палестинскиот Хамас, наводно одржана во Турција, и покрај тврдењето на Израел дека средбата се одржала.
Можно е на средбата да се разговарало и за продолжување на преговорите за ослободување на заложниците во Газа, пренесува Тас. Кан забележува дека Турција е избрана да биде домаќин на состанокот од безбедносни причини, бидејќи раководството на Хамас одлучило да разговара за овие прашања во живо и да го одржи состанокот во трета земја, во безбедна и затворена просторија, недостапна за израелските разузнавачи.
Организацијата за заштита на човековите права „Хјуман рајтс воч“ (ХРВ) вчера го обвини Израел дека намерно им ускратил на Палестинците храна, вода и други неопходни потреби, оценувајќи дека гладувањето на цивилното население е воено злосторство. Во исто време ХРВ ги повикува светските лидери да реагираат на ваквата ситуација во Газа. Директорот на ХРВ за Израел и Палестина Омар Шакир тврди дека има најмалку пет докази дека Израел намерно ги изгладнува Палестинците во Појасот Газа и дека тоа е воено злосторство. Шакир наведе дека првиот доказ е тоа што повеќе од два месеци е блокиран влезот на храна и вода, а вториот е дека е дозволен влез само на мала количина на помош. Тоа беше документирано повеќе од два месеци, изјави Шакир за Ал Џезира. Третиот доказ е уништување на земјоделско земјиште, четврти е уништување на објекти неопходни за живот, а петти се изјавите на израелските власти кои, како што наведе, „јасно кажале“ дека нивната стратегија е да гладуваат цивили во Газа како средство за постигнување политички резултати.
