Во официјална посета на земјава денеска престојува министерот за надворешни работи на Црна Гора Срѓан Дармановиќ. Во фокусот на дискусиите била соработката на планот на ЕУ и НАТО интеграцијата, потребата од инфраструктурно поврзување, а станало збор и за регионалната соработка и заедничката европска иднина.
Покрај средбата со министерот за надворешни работи на Република Македонија, Никола Димитров, министерот Дармановиќ ќе биде примен од претседателот Ѓорге Иванов, претседателот на Собранието Талат Џафери, како и од премиерот Зоран Заев.
„Неодамнешниот самит на Јадранската повелба во Подгорица, со заедничко ко-претседателство даде силен и охрабрувачки поттик за следните чекори на Република Македонија кон членството, и впрочем, Македонија заклучно со декември оваа година го завршува претседателството, а Црна Гора го презема во текот на идната година“, изјави Никола Димитров, министер за надворешни работи.
„На денешната средба е потврдена оценката дека односите на нашите две земји се содржајни, квалитетни, неоптоварени со отворени прашања, и се пример за одлична билатерална соработка во регионот“, рече Срѓан Дармановиќ, министер за надворешни работи на Црна Гора.