Владата на СДСМ за само три месеца ја покажа својата неспособност на полето на привлекување инвеститори и отворање нови работни места, во неа попусто постојат министри без ресор за привлекување инвестиции и двајца советници од Србија кои се плаќаат со народни пари. Овие дебели хонорари не донесоа никакви бенефити а резултатот од оваа неодговорност се нула инвеститори во овие три месеци и нула отворени работни места, истакна во неделата пред ТИРЗ пратеникот на ВМРО-ДПМНЕ, Драган Данев.
„Кој ќе одговара за залудно потрошените плати и дебели хонорари за овие ликови кои чмаат во владата, а од нив нема никој никаков аир. Економската политика на СДС е тотално фијаско. Странски инвеститори наместо да се привлекуваат, тие по секоја цена ги бркаат и тие кои веќе инвестирале во Македонија. Наместо да се отвораат нови работни места поради погрешните политики постои сериозна опасност илјадници луѓе да останат без работа од странските инвеститори кои веќе најавуваат заминување“, рече Данев.
Исткана дека ова нема да се одрази само на невработеноста, туку ќе се одрази и врз целото стопанство, бидејќи голем број на фирми се директно поврзани со производствениот процес во странските инвестиции.
„Распадот на економијата е неминовен со вакво неработење на владата на СДС. Граѓаните сакаат да стават крај на оваа погубна политика. Тоа ќе се случи сега на престојните локални избори кога ќе им биде испорачана казната за нивната неспосбност и неодговорност“, предупреди Данев.
