Данската полиција во средата објави дека истражува две експлозии во близина на израелската амбасада и дека привела тројца млади Швеѓани на сослушување, додавајќи дека експлозиите најверојатно се резултат на детонација на граната.
Двајца мажи биле уапсени во воз на централната станица во Копенхаген, додека третото лице било уапсено веднаш по експлозиите, изјави за новинарите началникот на полицијата Јенс Јесперсен. Две рачни гранати најверојатно ги предизвикале експлозиите што предизвикале штета на зграда на околу 100 метри од амбасадата, додаде тој.
„Не можеме со сигурност да кажеме дека амбасадата била цел на тие експлозии. Истражуваме и дали тие дејствувале сами, на барање на некој друг или заедно“, рече Јесперсен.
Портпаролот одби да каже како трите млади момчиња, на возраст меѓу 15 и 20 години, се поврзани со инцидентот, но рече дека полицијата ќе поднесе прелиминарна пријава за нелегално поседување оружје.
Оваа година, најмалку 10 Швеѓани се обвинети во Данска за обид за убиство или поседување оружје. Тоа предизвика тревога и остри критики во општеството во однос на ширењето на организираниот криминал.
„Шокирани сме од она што се случи. Никој не е повреден и никој немаше во амбасадата во моментот на експлозиите“, изјави портпаролот на амбасадата.
Данските безбедносни и разузнавачки служби и помагаат на полицијата во истрагата и размислуваат за зголемување на нивото на безбедност околу институциите поврзани со еврејската заедница.
Каролинесколен, еврејското училиште во Копенхаген, ќе остане затворено до крајот на денот поради неговата близина до местото на злосторството.
Во соседна Шведска веќе имаше неколку слични инциденти во близина на израелската амбасада. Шведските власти, исто така, потврдија дека полицијата спречила неколку планирани напади режирани од иранските безбедносни служби со помош на локални криминални мрежи. Иран ги нарече шведските обвинувања „неосновани“.
