Како независен аналитичар, како човек кој отстрана ги следи и набљудува политичките процеси, и во историјата и денес, знам дека брзо ќе се сменат нештата, и ВМРО-ДПМНЕ на реваншизмот ќе одговори со двоен реваншизам, пишува на својот ФБ профил универзитетскиот професор Александар Даштевски, како предупредување до челникот на СДСМ, Зоран Заев, и нзаканите за одмаздничките чекори кои доаѓаат од неговата партија и на неа блиските медиуми.
„Дали Заев мисли дека ќе остане се вака? Дека нема да се сменат работите во политиката и дека вечно ќе владее? Дека ВМРО ќе му заборави и нема да врати со дебела камата ако оди со политички и партиски освети? Дали и оние “коконите” од СЈО мислат дека народот ќе ја врати силата на ВМРО, и ВМРО ќе се врати на власт? Дали мислат дека за сите неправди, лаги, конструкции, политички монтировки, уништувања животи и семејства ќе останат без одговор? Дали се свесни дека трите илјади евра кои ги јадат и пијат секој месец со цел политички па и човечки да линчуваат луѓе и цела една партија ќе се заборават?“, пишува Даштевски.
„Што бараат, ќе си добијат!“ вели Даштевски и потсетува дека СДСМ на сличен начин „се залетале“ и во периодот од 2002 до 2006 година кога се вратија на власта по воената 2001 година.
„Мислеа дека тие што ќе ги елиминираат нема да можат да вратат, бидејќи доволно ќе ги искомпромитираат. И навистина, не врати ни Ламбе, ни Војо, ни Никола Тасев, ни онаа жената од Гевгелија која ја притвораа за ништо, не врати ни Љубчо. Но со дебела камата врати новиот тим на ВМРО, и тоа со факти, аргументи и докази. А такви докази со кои ќе враќаат за дел од СДС има уште сега, и нема да застарат. И којзнае уште колку ќе ги има откако ќе почнат да работат во владата. Нема да им помогне што новиот обвинител ќе им ги затвори започнатите истраги. Ќе дојде нов и ќе ги отвори. Тој што оди на политичко осветеништво треба да е спремен дека тоа ќе му се врати, само време е во прашање“, пишува Даштевски.
Додава дека ова не треба да се сфати дека е потребен принцип на неказнивост, но политички прогон без докази, со притисок на судот што е веќе очигледно, преку политичко партиско СЈО ќе предизвика исто такво по некоја година.
„Не разбирам како Заев планира да владее во една ваква атмосфера во која ВМРО ќе биде максимално мобилизирана за континуирана борба. Ќе им помине мандатот со хајки, и ништо нема друго сериозно да направат. Овие десетина, петнаесет мерки што ги најавуваат се ситни и нема да го задоволат народот. Такви мерки ВМРО имаше илјада. Водејќи хајки ќе завршат во хајка сплетена од самите нив. Мислам дека СДСМ и Заев не се свесни што ги чека кога ќе влезат во владата. Колку проблеми ги чекаат, колку тешки одлуки, колку големи очекувања има, и со право, бидејќи ветувањата беа големи“, се додава во постот на Даштевски.
Предурпедува дека планот СДСМ да се извлекува на претходната власт, по 26 години искуство и демократија, нема да мине, „па макар Заеви да купат 24 медиуми“ и оти многу брзо ќе се соочат со многуте сопствени намерни и ненамерни грешки.
„Сега уште се во кампања. Не излегоа од тој филм. Набрзо ќе се соочат со реалноста и со сопствениот капацитет за водење држава. Сите оние кои сега охрабрени од надворешната интервенција за носење на ВМРО во опозиција, а СДС на власт плукаат по ВМРО, многу брзо ќе се срамат од тоа што сега го зборуваат и прават. Странците ќе ги исполнат своите цели и ќе се фокусираат на други нивни цели на други места. Ние ќе останеме тука и ќе бидеме сведоци на последиците од владеењето со хајки, и надворешни диктати“, порачува Даштевски.
