Македонскиот ракометен шампион ЖРК Вардар СЦБТ го продолжи договорот со левото крило Сираба Дембеле на две години, односно до сезоната 2015/16. Со овој потег, менаџментот на македонскиот првак ги потврди своите високи амбиции за во иднина. Левото крило во составот на Индира Кастрaтовиќ изрази големо задоволство поради продолжувањето на договорот и најави нови успеси со екипата на ЖРК Вардар.
“Вардар СЦБТ е клуб со големи амбиции и ми преставува особена чест што и претстојните две сезони ќе го носам дресот на македонскиот шампион. Иако станува збор за нова екипа, мислам дека играме одлично и ги надминавме сите очекувања оваа сезона. Ова е екипа чија што крајна цел е освојување на титулата во Лигата на шампионите, и нормално е секој да сака да настапува во таков тим. Вардар СЦБТ ја има најдобрата ракометна публика во Европа и се надевам дека заедно ќе прославуваме уште многу успеси” , изјави Дембеле.
